POUR LA ROYNE MÈRE DU ROY
La Royne mère m'a donné charge entendre si vous lui sçauriez donner quelque devis ou portraict ou modelle de quelque ordonnance et façon estrange d'une grotte qu'elle a voulu fère construire en quelque lieu délectable de ses terres; laquelle grotte elle prétend édifyer, enrichir et aorner de plusieurs jaspes estranges et de marbres, pourfires, couralz et diverses quoquilles, en la forme et manière de celle que monseigneur le cardinal de Lorraine a faict construire à Mudon.
RESPONSE
S'il plaist à la Royne me commander lui fère service à tel chose, je luy donneray la plus rare invention de grotte que jusques icy aye esté inventée, et si ne sera en rien semblable à celle de Mudon.
Je vous prie me fère entendre de quelle chose vous
vouldriés aorner et enrichir vostre grotte, affin que j'en t face le récyt à ladicte Royne.
RESPONSE
La grotte que je vouldrois conseiller fèrey elle seroit toute, par le dehors, de pierres communes, et, par le dedans, de terre cuicte en forme d'un rochier est^range ; le tout eririchy, insculpé et esmaillé de diverses choses inénarrables.
DEMANDE
Voire, mais cela serait dangereux à rompre et de petite durée; car Ton sçait bien qu'il n'y a rien de plus frangible que la terre.
RESPONSE
Et je vous asseure que si la Royne m'avait commandé luy faire une grotte de l'invention susdite, qu'elle seroit de plus grand durée cent fois que non pas celle de Mudon; car ceulx qui disent que la terre est par trop frangible, ilz l'entendent fort mal, car elle est beaucoup plus dure quand elle est bien cuicte que n'est pas la pierre, mais ce qui la fait appeler frangible, c'est parce qu'on l'applique à vaisseaux qui sont terves (minces) ; mais si elle estoit cuicte par masses aussi grosses comme sont les pierres, il n'y a si bon ferrement qui ne fust soudain usé en les taillant en la forme que l'on taille les pierres. Aussi, si l'on faisait des vaisseaux de pierres communes aussi terves que ceux de terre, ilz se trouveroyent beaucoup plus frangibles que non pas ceux de terre.
DEMANDE
Et pourquoy dis-tu qu'elle serait de plus longue durée que celle de Mudon?
RESPONSE
Parce que les enrichissemens en dedans de celle de Mudon sont cymentés et placqués, rapportés de plusieurs pièces, lesquelz seront subgectz à estre desrobés au changement des seigneurs du lieu; mais il ne sera pas ainsi de celle qui sera faicte de mon art, parce que toute l'œuvre de terre qui sera par dedans sera massonnée et lyée avecques la muraille du dehors, et, par tel moyen, Ton ne pourra rien arracher de sa parure, que premièrement on ne rompe toute la muraille.
DEMANDE
Il fauldroit, pour ceste cause, que tu me fisses un discours bien au long de l'ordonnance de la grotte que tu vouldrois entreprendre pour ladicte Royne, et, me Payant donné par escrit, je mettray peine de luy faire entendre.
RESPONSE
S^il plaisoit à la Royne me commander une grotte, je la vouldrois faire en la forme d'une grande caverne d'un rochier; mais, afin que la grotte fust délectable, je la vouldrois aorner des choses qu^l s'ensuyt :
Et premièrement, audedans de l'entrée de la porte, je vouldrois faire certaines figures de termes divers, lesquelz seroient posez sur certains pieds d'estratz pour servir de colonne, et, au-dessus des testes desdicts termes, il y auroit certains arquitrave, frise et çornische, timpans et frontespice, et le tout insculpé d'une telle invention que je vous» feray entendre cy-après; et les deux costés du longis de la muraille, à dextre et à sénestre, je voulrois qu'il fust tout garny de niches que aulcuns appellent doulcyers, lesquelles nyches ou doulcyers serviroient un chascun d'une chaire ; entre lesquelles nyches il y auroit un pilastre et une colonne
faisant la division des deux nyches ; aussi audessoubz d'une chascune colonne il y auroit un pied d'estratz en ensuivant Tordre des antiques, et le tout enrichy en la manière que je vous diray par après.
Et quant au pignon qui seroit à l'aultre bout de la grotte, je vouldrois l'enrichir de plusieurs termes, lesquelz seroient portez sur un rochier qui contiendroit toute la largeur de la grotte, et de la haulteur aultant qu'un homme pourroit toucher de la main, duquel rochier sortiroient plusieurs pissures de fontaines en la manière que je -vous diray ci-après; et audessus des testes des termes, il y aurait une arquitrave, frise et corniche qui régneroit tout à l'entour de ladicte grotte, et audessus de la corniche il y auroit, tout à l'entour, un grand nombre de fenestres, qui monteroient jusques à un pied près du commencement des vouftes, lesquelles fenestres seroient fort estranges, comme pourrez entendre cy-après. Aussi je vous feray entendre cyaprès le discours des voultes; mais premièrement, je vous veulx fère entendre l'enrichissement et beaulté des choses que je vous ay nommées ci-dessus.
De la beaulté et aornement de la grotte
Notez que le grand rochier, qui seroit au pignon opposite du portai, seroit insculpé par un nombre infini de bosses et de concavités, lesquelles bosses et concavités seroient enrichies de certaines mousses et de plusieurs espèces d'herbes qùi ont accoustumé de croître es rochiers et lieux aquatiques, qui sont communément escolopandre, adienton, politricon, capillis veneris, et aultres telles espèces d'herbes que l'on adviseroit estre convenables; et, depuis le tiers du rochier en haut, je vouldrois mettre plusieurs lézars, langrottes, serpens et vipères, qui ramperoient au
long dudict rochier, et le surplus dudict rochier seroit aorné et enrichy d'un nombre infini de grenoilles, chancres, escrevisses, tortues et yraignes de mer, et aussi de toutes espèces de coquilles maritimes ; aussi sur les bosses et concavités, il y aurait certains serpens, aspicz et vipères couchez et entortillez de telle sorte que la propre nature enseigne, et, au bas, joignant ledict rochier, il y auroit un foussé contenant la largeur de ladicte grotte, lequel foussé seroit tout entièrement aorné de toutes les espèces de poissons que nous avons en usaige, lequel poisson serait ordinairement couvert d'un nombre infiny de pissures d'eau qui tomberoient dudict rochier dans le foussé, tellement que les pissures qui tomberoient feroient mouvoir l'eau du foussé, et, par certains éblouissemens ou mouvemens de Peau, on perdroit de veue par intervalles le poisso,n, en telle sorte que Ton penseroit que ledict poisson se fust démené ou couru dans ladicte eau ; car il fault entendre que toutes ces choses cy-dessus seroient insculpées et esmaillées si près du naturel, qu'il est impossible de le racompter.
Et quant aux termes qui seront assis sur le rochier des fontaines, il y en auroit un qui seroit comme une vieille estatue mangée de l'ayr ou dissoulte à cause des gelées, pour démonstrer plus grande antiquité.
Et après cestuy-là, il y en auroit un aultre qui seroit taillé en forme d'un rochier rustique, au long duquel il y auroit plusieurs mousses et petites herbes, et un nombre de branches de lierre, qui ramperoient à l'entour d'iceluy pour dénotter une grande antiquité.
Item, après cestuy-là, il y en auroit un aultre qui seroit en façon, comme bien souvent l'on trouve, des pierres que, en quelque endroit qu'elles soient rompues, l'on y trouve un grand nombre de quoquilles creues et formées audedans de la mesme masse; aussy s'y trouve ung nombre de chail-
loux, lesquels chailloux et quoquilles sont beaucoup plus durs que non pas le résidu de la masse.
Item, il y en auroit un aultre qui seroit tout formé de diverses quoquilles maritimes; sçavoir est les deux yeux de deux quoquilles; le nez, bouche, menton, front, joue, le tout de quoquilles, voire tout le résidu du corps ; et si quelqu'un ose disputer que ce n'est pas imyter nature, je prouveray que si, parce que je monstreray, si besoing est, plusieurs rochiers et pierrières qui, en quelque endroict que Ton les puisse coupper, elle se trouvent toutes pleines de quoquilles, voire si près à près, qu'elles se touchent Tune à l'autre.
Item pour faire esmerveiller l,es hommes, je en vouldrois fère trois ou quatre vestus et coiffés de modes estranges, lesquelz habillemens et coiffures seroient de divers linges, toiles ou substances rayées, si très approchant de la nature, qu'il n'y auroit homme qui ne pensast que ce fust la mesme chose que l'ouvrier auroit voulu imyter.
Et quant aux nyches, colomnes, pieds d'estracz et pilastres, je les vouldrois fère de diverses couleurs de pierres rares, comme sont pourphires, jaspes, cassidoines et de diverses sortes d'agates, marbres et grisons madrez, en imitant les natures les plus plaisantes qui se pourroient fère et imaginer.
Et quant aux deux quadratures qui seroient à la dextre et sénestre de l'entrée de la porte, s'il plaisoit à la Royne mère, je y vouldrois fère certaines figures après le naturel, voire imitant de si près la nature, jusqu'aux petis poilz des barbes et des soursils, de la mesme grosseur qui est en la nature, seroient observez.
Et quant aux fenestres qui règneroient à l'entour, elles seroient d'une invention fort monstrueuse et beaulté indicible; car je les vouldrois fère fort longues, estroites et biaises, ne tenant aulcune ligne perpendiculaire ne directe;
car elles seroient formées comme si un rochier avoit esté couppé indirectement pour passer un homme, en telle sorte que les fenestres se trouveroient biaises, tortues, bossues et contrefaictes; et néanmoins elles seroient aornées, insculpées, madrées et jaspées de toutes les beaultés dessus dictes.
Et quant aux voultes, elles seroient tortues, bossues et enrychies de semblable parure que dessus; et tout ainsi que Ton voit ez vieulx bastimens que les pigeons, grolles, arondelles, fouynes et bellètes font leur nyds, je vouldrois aussi insculper plusieurs de telles espèces d'animaulx ausdites voultes.
Et quant au pavement du dessoulz, je le vouldrois fère d'une invention toute nouvelle, non moins admirable que les aultres choses que dessus.
Aussi parce qu'il y auroit une table de mesme matière, je vouldrois aussi lui fère un buffet de semblable parure, lequel je vouldrois asseoir joignant les fontaines.
DEMANDE
Et sy vous vouliez édifyer un tel bastiment en un lieu qu'il n'y eust poinct d'eau, que vous serviroient vos fontaines ?
RESPONSE
Encores pourroient-elles servir beaucoup, parce que, si Ton voulait banqueter en ce lieu, Ton pourroit fère pisser les fontaines durant le banquet, et ce par certaine quantité d'eau que Ton mectroit en un canal secret qui seroit par le dehors de la grotte.
