CHANSON L

Pour vous monstrer que point ne vous oublye Gomme vostre que suis où que je soye, Présentement ma chançon vous envoyé :

Or la prenez en gré, je vous en prye.

En passant temps plain de mérencolye, Lautr'ier la fis, ainsy que je pensoye, Pour vous monstrer que point ne vous oublye Comme vostre que suis où que je soye.

Mon cueur tousjours si vous tient compaignie , Dieu doint que brief vous puisse veoir à joye ! Et à briefz motz, en ce que je pourroye, A vous m'offre du tout à chière lye, Pour vous monstrer que point ne vous oublye.

CHANSON Ll.

Ma seule amour, ma joye et ma maistresse, Puisqu'il me fault loing de vous demourer, Je n'ay plus riens à me réconforter Qu'un souvenir pour retenir Lyesse.

En allégiant, par Espoir, ma destresse, Me convendra le temps ainsy passer,

Ma seule amour, ma joye et ma maistresse. Puisqu'il me fault loing de vous demourer.

Car mon las cueur, bien garny de tristesse, S'en est voulu avecques vous aler ; Ne je ne puis jamais le recouvrer Jusques verray vostre belle jeunesse.

Ma seule amour, ma joye et ma maistresse.