BALLADE SUR LA PAIX XC
Priez pour paix, doulce vierge Marie, Royne des cieulx et du monde maistresse ; Faictes prier, par vostre courtoisie, Saints et saintes, et prenez vostre adresse Vers vostre filz, requérant sa haultesse Qu'il lui plaise son peuple regarder Que de son sang a voulu racheter, En desboutant guerre qui tout desvoye.
De prierez ne vous vueilliez lasser :
Priez pour paix, le vray trésor de joye.
Priez prélats et gens de sainte vie,
Religieux ne dormez en peresse ;*
Priez maistres et tous suivans clergie,
Car par guerre fault que l'estude cesse.
Moustiers destruis sont, sans qu'on les redresse,
Le service de Dieu vous fault laissier
Quant ne povez en repos demourer.
Priez si fort que briefment Dieu vous oye;
L'église voult à ce vous ordonner :
Priez pour paix le vray trésor de joye.
Priez princes qui avez seigneurie,
Rois, ducs, contes, barons plains de noblesse,
Gentilz-hommes avec chevalerie ;
Car meschans gens surmontent Gentillesse,
En leurs mains ont toute vostre richesse.
Débatz les font en hault estât monter ;
Vous le povez chascun jour veoir au cler,
Et sont riches de voz biens et monnoye,
Dont vous deussies le peuple supporter.
Priez pour paix, le vray trésor de joye.
Priez peuple qui souffrez tirannie :
Car voz seigneurs sont en telle t'oiblesse Qu'ilz ne pevent vous garder par mestrie, \e vous aidier en vostre grant destresse. Loyaulx marchans la selle si vous blesse. Fort sur le dos chascun vous vient presser Et ne povez marchandise mener :
Car sous n'avez seur passage ne voye Et maint péril vous convient-il passer.
Priez pour paix, le vray trésor de joye.
Priez galans, joyeulx en compaignie, Qui despendre desirez à largesse; Guerre vous tient la bourse desgarnie.
Priez amans qui voulez en liesse Servir amours; car guerre par rudesse Vous destourbe de voz dames hanter, Qui maintes foiz fait leurs vouloirs tourner Et quant tenez le bout de la courroye Ung estrangier si le vous vient oster.
Priez pour paix, le vray trésor de joye.
Dieu tout puissant nous vueille conforter Toutes choses en terre, ciel et mer!
Priez vers lui que brief en tout pour voye, En lui seul est de tous maulx amender : Priez pour paix le vray trésor de joye.
