CHANSON LXVJ

Mon cueur se combat à mon éueil, Jamais ne les trouve d'accort; Le cueur dit que l'eueil fait rapport Que tousjours lui acroist son dueil.

La vérité savoir j'en vueil, Que semble-il qui ait le tort?

Mon cueur se combat à mon éueil, Jamais ne les trouve d'accort.

Se je trouve que Bel-acueil Ait getté entre eulx aucun sort, Je le condempneray à mort :

Doiz-je sousfrir ung tel orgueil?

Mon cueur se combat à mon éueil.

CHANSON LXVH.

Tant que pasques soient passées, Se nous avons riens trespassé, Prions mercy du temps passé Et pour les âmes trespassées.

Chascun pas à pas ses passées Face avant que soit trespassé, Tant que pasques soient passées Se nous avons riens trespassé.

Foleur a fait grandes passées, Mains cueurs ont tout oultre passé ; Pour ce, par nous soit compassé D'eschever faultes compassées, Tant que pasques soient passées.