C A ROLE II F
M'avez- vous point mis en oubly, Par Dieu ! je doubte fort oï, Ma seule maistresse, et ma joye !
Non pourtant, quelque part que soye Je m'attens à vostre mercy.
Espoir m'a dit que Léauté Vous fera souvenir de moy ; Car vostre bonne voulenté Ne peut faillir, comme je croy.
Quant est à moy, je vous supply, Pensez que l'amoureux party Que j'ay prins, changïer ne pourroye ; Certes, avant mourir vouldroye, Je vous prometz qu'il est ainsi, M'avez-vous point mis en oubly?
Amour à tort, ce m'est advis, Qu'il ne fait aux dames sentir Les maulx ou leurs servans sont mis Pour les très loyaument servir.
Pour vous, madame, je le dy :
Car se vous saviés le soussy Qu'Amours pour vous servir m'envoye, Vous diries bien que j'auroye De droit gaingné le don d'amy, M'avez-vous point mis en oubly ?
Et ne cesserez-vous jamais?
Tousjours est à recommancer :
C'est folie d'y plus penser, Ne s'en soussier désormais.
Plus avant j'en diroye; mais Rien n'y vault flatter ne tanser.
Et ne cesserez-vous jamais ?
Tousjours est à recommancer.
Passez à plusieurs mois des mays Qu'Amour vous vouldrent avaliser Mal les voulez recompenser En servant de telz entremais, Et ne cesserez-vous jamais?
Laissez aler ces Gorgias Chascun yver à la pippée
Vous verrez comme la gelée Reverdira leurs estomas.
Dieu scet s'ilz auront froit aux bras Par leur manche deschiquetée.
Laissez aler ces Gorgias, Chascun y ver à la pippée.
Hz portent petiz soulers gras A une poulaine embourrée, Froidure fera son entrée Par leurs talons nuz par embas :
Laissez aler ces Gorgias.
Les en voulez-vous garder Ces rivières de courir, Et grues prendre et tenir Quant hault les véez voler ?
A telles choses muser Voit-on fols souvent servir :
Les en voulez-vous garder Ces rivières de courir?
Laissez le temps tel passer Que Fortune veult souffrir, Et les choses avenir Que l'en ne scet destourber. Les en voulez-vous garder?
Durant les trêves d'Angleterre Qui ont esté faictes à Tours, Par Bon -conseil, avec Amours J'ay prins abstinence de guerre.
S'autre que moy ne la desserre, Content suis que tiengne tousjours Durant les trêves d'Angleterre Qui ont esté faictes à Tours.
Il n'est pas bon de trop enquerre.
Ne s'empeschier es faiz des cours^ S'on m'assault pour avoir secours Vers Nonchaloir iray grant erre Durant les trêves d'Angleterre.
Vous vistes que je le véoye Ce que je ne vueil descouvrir, Et congnustes à l'ueil ouvrir Plus avant que je ne vouloye.
L'ueil d'embuscne saillit en voye, De soy retraire n'eut loisir :
Vous vistes que je le véoye Ce que je ne vueil descouvrir.
Trop est saige qui ne foloye Quant on est es mains de Plaisir, Qui lors vint vostre cueur saisir Et fist comme pieça souloye, Vous vistes que je le véoye.
Tant que Pasques soient passées, Sans resveillier le chat qui dort, Frédet, je suis de vostre accort Que pensées soient cassées
Et en aumaires entassées, Fermans à clef très bien et fort, Tant que Pasques soient passées Sans resveillier le chat qui dort.
Quant aux miennes, ilz sont lassées ; Mais de les garder mon effort Feray, par l'avis de Confort, En fardeaulx d'espoir amassées Tant que Pasques soient passées.
