CHANSON XI

Ce mois de may, nompareille princesse, Le seul plaisir de mon joyeulx espoir, Mon cueur avez et quanque puis avoir : Ordonnez-en comme dame et maistresse.

Pour ce, requier vostre doulce jeunesse Qu'en gré vueille mon présent recevoir, Ce mois de may, nompareille princesse. Le seul plaisir de mon joyeulx espoir.

Et vous supply, pour me tollir tristesse, Très humblement et de tout mon povoir ., Qu'a m'esmayer aiez vostre vouloir D'un reconfort bien garny de liesse, Ce mois de may, nompareille princesse.