CHANSON XXVI

Dedens mon sein, près de mon cueur, J'ay mussié un privé baisier Que j'ay emblé maugré Dangier:

Dont il meurt en peine et langueur.

Mais ne me chault de sa doleur; Et en deust-il vif enragier, Dedens mon sein près de mon cueur J'ay mussié un privé baisier.

Se Madame, par sa doulceur,

Le veult souffrir, sans m'empeschier,

Je pense d'en plus pourchassier,

Et en feray trésor greigneur,

Dedens mon sein, près de mon cueur.

De vostre beauté regarder, Ma très belle, gente, maistresse, Ce m'est certes tant de lyesse^ Que ne le sauriez penser.

Je ne m'en pourroye lasser :

Car j'oublie toute tristesse De vostre beauté regarder, Ma très belle, gente, maistresse.

Mais pour mesdisans destourber

De parler sur vostre jeunesse, Il fault que souvent m'en délaisse ; Combien que ne m'en puis garder De vostre beauté regarder.

Prenez tost ce baisier, mon cueur, Que ma maistresse vous présente, La belle, bonne, jeune et gente, Par sa très grant grâce et doulceur.

Bon guet ieray, sus mon houneur, Afin que Dangier riens n'en sente :

Prenez tost ce baisier, mon cueur, Que ma maistresse vous présente.

Dangier toute nuit en labeur A l'ait guet : or, gist en sa tente ; Accomplissez brief vostre entente Tandis qu'il dort, c'est le meillieur : Prenez tost ce baisier, mon cueur.