CHANSON XXX

Si vous plaist vendre voz baisiers, J'en achaitteray voulentiers, Et en aurez mon cueur en gage Pour les prandre par héritage, Par douzaines, cens, ou milliers.

Ne les me vendez pas si chiers Que vous feriez à estrangiers; En me recevant en hommage, S'il vous plaist vendre voz baisiers.

J'en achaitteray voulentiers, Et en aurez mon cueur en gage.

Mon vueil et mon désir entiers Sont vostres, maugre tous dangiers; Faictes, comme loyalle et sage, Que pour mon guerdon et partage Je soye servi des premiers, S'il vous plaist vendre voz baisiers.