JEHANNE D'ALBRET A LA REINE ELISABETH D' ANGLETERRE

5 avril 1572.

Madame , le commun ordre des affaires des grands est ordinayrement si accompagné de difficultés, que l'assurance ne s'en peut prandre qu'à la conclusion qui a esté cause, Madame, que je ne vous ay plus tost faict savoir ce que j'étoys venu négosier en ceste court pour en estre. l'incertitude si grande non par défault de la bonne volonté des prinsypaus et menées des esprits turbulant, ennemys du repos public et du leur mesme, s'ilz le pouvoyent bien considérer, néanmoins tous ces fàcheus obstacles. Dieu, par sa bonté qui a toujours ung soing particulier de ceus qui s'apuient sur sa sage providence, m'a regardé de son œil paternel et a séparé ce brouail de difficultés et enfin, Madame, a disposé les cœurs d'un costé et d'autre pour prandre une résolution indisoluble du mariage de Madame avec mon filz, ce qui fut faict hier où comme le Diable avoit insité plusieurs esprits de division pour l'empêcher, depuis que j'ay esté arrivée, Dieu opposant sa bonté à leur malise s'est servy de ceus de douceur et amateurs d'union et de repos pour l'acomplir. Je n'ay voullu faillir, Madame, vous en advertir et m'en resjouir avecq vous comme avecq celle qui fait et a sagement préveu combien ceste allianse peult servir non simplement au bien et repos de ce royaulme auquel vous estes sy afïectyonnée, mays que cest heur estandra ses branches jusques aus voysins : parmi tant

ET DE JEHANNE d'aLBRET. 355

de grandes raysons, Madame, qui vous peuvent contenter, l'amitié qu'il vous a toujours plu me porter m'y fera mètre mon heur particullier que je ne vous pourroys assez exprimer, sachant, Madame, que vous me ferez cest honneur de le ressentir. Je ne veus isy estre acusée d'ingratitude en vostre endroit et faillir à vous remersier tres-humblement des bons offices que Messieurs vos ambassadeurs y ont faictz et comme ilz m'ont dit par vostre commandement qui me redouble ceste obligation de longtemps commencée. Je vous suplie très-humblement, Madame, me pardonner la hardiesse à laquelle vostre bonté me convie et sy je vous dis que je desiroys infiniment me resjouir avec vous de semblable occasion en vostre endroit ; car je ne vous celleray point, Madame, que comme désireuse de vostre heur et contentement, je ne fasse tous les jours prière à Dieu de vous donner ung mary duquel vous puissiez pour vostre particullier et le public de vostre royaulme recevoir toutes les bénédictions que Dieu promet aus siens et luy continuant ceste suplicasion, j'y adjousteray qu'il vous donne cependant heureuse et longue vie et resgne paisible comme vostre vertu le mérite, me recommandant très-humblement à vostre bonne grasse.

De Bloys, ce 5 d'avril 1572.

De par

Vostre très-humble et obéissante seur.

Jehanne.

(Breq. Vol. 95, fol. 4— Bibl. Cotton. Vespas. F. VI, fol. 17 (Angleterre.)