AU MEME

(Saint-Cloud, jiiin 1537.)

Mon nepveu, de peur de vous empescher, j'ay escript par deux fois à Yzarnay Testât de la maladie du roy de Navarre, dont je n'ay eu nulle response; mais ayant entendu, par lettres escriptes à quelques ungs de ceste ville, que le Roy s'est trouvé mal trois ou quatre jours , et que , Dieu mercy, il est guéry et party du lieu où il estoit, je ne me puis garder de me plaindre à vous de vous mesmes de ce que aous n'avés commandé à quelqu'un de le m'escripre. Je m'attendois tousjours à Yzarnay, mais craingnant que vous l'ayiés occupé en aultre chose , je vous prie bien fort , mon nepveu, ordonner à Bertereau ou à Estienne que , par tous ceulx quy viendront en ceste ville , ilz me mandent de la bonne santé du Roy et de la vostre. Car sy Dieu ne donne mieulx au roy de Navarre, j'ay peur que de quinze jours il ne soit prest à partir d'icy, pour ce que sa fiebvre, qui jusques au cinquiesme a esté continue , et que à ce matin je pensois du tout dehors , après digner luy est un peu reprise, avecques douleur de teste, quy me faict craindre la tierce, de quoy encores j'ay cause de me contenter le voyant hors du dangier où je l'ay veu pour quatre jours. Croyés , mon nepveu, qu'il a sy grant regret de ne pouvoir estre en lieu où il fasse service au Roy, que je ne luy ay ousé monstrer ce que ce porteur apporte de M. de Bourdeaux, dont j'escrips bien au long à M. de Sainct An-

dré, pour vous prier penser que M. de Bourdeaux se plaint de demeurer seul, et luy semble qu'il ne tient qu'au roy de Navarre qu'il n'ait ce qu'il demande, dont le roy de Navarre ayant faict son debvoir de supplier le Roy, ou d'y envoyer quelqu'un ou d'y aller luy mesmes , voyant le peu d'ordre qu'il y a eu jusques icy, en a eu tant d'ennuy que je ne luy en ouse parler, veu qu'il n'est pas en estât de rien servir. Par quoy je vous prie, mon nepveu, vouloir satisfaire à M. de Bourdeaux , et envoyer celuy qu'il plaist au Roy quy y aille , car le temps vous presse , et l'empereur n'a désir que de faire une surprise. Je vous ai dict souvent que le roy de Navarre n'a lieu quy vaille ung coup de poing , et sy n'a mis nul ordre en ces pays , car en son absence, il estoit difficile , sans faire un grant bruit de guerre, que le Roy n'a voulu estre faict, que les estats d'Espaigne ne feussent tenus. Par quoy il me semble que sy vous ne pourvoyez à Rayonne et Dax , ce cousté là est bien foible, quelque petite armée que ce soit. Je vous prie, mon nepveu, y vouloir penser, car je m'adresse à vous congnoissant combien vous avés à cœur ce quy touche le bien du Roy et du royaulme, de quy vous estes tel servicteur et sy suffisant, que l'on vous peult dire sans corapaignon, et me pardonnerés sy je vous tiens tant à lire, mais vous sçavés que la matière le requiert , et aussy que à vous seul s'adresse de tous ses affaires

Vostre bonne tante et vraye amye, Marguerite.

[ K. Bélh.,n<>9127, fol. 3.]