LETTRE XVII

du même. (9 septembre 1488.)

De par le Roy.

Chers et bien amez, combien que, après la victoire qu'il a pieu à Dieu nous donner on pays de Bretaigne, et les prinses des villes de Fougières, de Dinan et de Saint- Malo, il nous estoit facille tirer plus avant et mectre le surplus du dict pays en nostre obéissance, toutesfoiz, pour ce que nostre intention ne fut oncques de procéder à conquestc de pays ne aussi à vengence, mais

seullement de rompre les mauvaises entreprinses fêtes on dict pays de Bretaigne, contre nous et nostre royaume, et tenir nostre dict royaume en seureté, nous, pour honneur et révérance de Dieu et à la prière et requêste de nostre très cher et très amé cousin le duc de Bretaigne, avons esté contens de faire et accorder bon traicté de paix à l'onneur, prouffit et seureté de nous et de nostre dict royaume, et, pour ce qu'il est convenable faire publier icelle paix, voulons et vous mandons faire crier et publier que bonne, seure, vraye et perpétuelle paix, amytié, union et concorde est, et doresenavant sera à tousjours inviolablement , entre nous et nostred. cousin le duc de Bretaigne, noz hoirs, successeurs, pays et seigneuries et les siens, et, à cause de la brevieté du temps, ne vous avons peu envoier le double du dict traicté de

paix, mais bientost le vous envoyerons.

Donné au Mans, le ixe jour de septembre.

CHARLES

Jamont.

A nos chers et bien amez les gens d'église , officiers, nobles, bourgoys , manans et habitans de nostre ville de Tours.

Présentées en l'ostel de la ville, le xvie jour de septembre l'an mil mi c- mi xx et huit par Simon Poilleux , chevaucheur , et publiées le dict jour.