DE CHARLES IX

(24 juillet 1568.)

De par le Roy.

Chers et bien amés, nous avons entendu, à nostre grand regret, les meschans et malheureux actes et la pernicieuse et dangereuse entreprinse que, par la témérité et insolence d'aucuns de nostre ville de Tours , ont esté faictes premièrement à l'encontre des soldats que nous avons ordonnez tenir garnison en la dite ville pour vostre salut et deffence, et, après, contre le sieur de la

Chastre, nostre lieutenant général et représentant nostre personne et le sieur de Sain et- Martin, ayant charge de nous en la dite ville de la garde du pont d'icelle, s'estans tellement obliés de l'obéissance et debvoir dont ils sont tenuz envers nous, qu'ilz ont osé, sans vouloir recongnoistre ledit sieur de la Chastre ne son authorité, luy tirer coups de harquebuzes et, depuis, tué et massacré Sainct - Martin et faict infinyes autres démonstrations de mespriz et contemnement de leur authorité et, par conséquent, de la nostre, et, pour ce que c'est chose qui nous apporte si grand malcontentement qu'il n'est possible de plus, et que nous désirons faire congnoistre à tous noz subjeetz combien telles entreprinses nous déplaisent et en faire si griefve et exemplaire punition qu'il en soit mémoire à tousjours, nous voulons, vous mandons, commandons

et très expressément enjoignons que, vingt quatre heures après la présente receue, vous ne faillez de mectre entre les mains du dict sieur de la Chastre tant les auteurs de la sédition advenue que leurs fauteurs et adherans , pour leur faire faire et parfaire leur procès, et après les punir de telle et si griefve pugnition que l'énormité et grandeur de leur péché le mérite, et ce, sur peyne de nous en prendre à tout le corps de la ville, et pour ce n'y faictes faulte, car tel est nostre plaisir. Donné au chasteau de Boloigne, le xxini6 jour de juillet 1568.

CHARLES

FlSES.

( Suscription. ) A nos chers et bien amez les maire, eschevins, manans et habitans de nostre ville de Tours.

(Au dos, en écriture du temps. ) Lettre du Roy receue par les mains de Monsieur de la Chastre, le 27e de juillet 1568.