LETTRE VIII
du même. (26 juin 1421.)
De par le régent le royaulme, daulphin de Viennois.
Très chiers et bien amez, nous tenons que vous saichez assez comment nous nous sommes mis sus, en toute puissance, pour le repoucement de noz ennemiz, soit par la bataille ou autrement, et le recouvrement de la sei-
gneurie de monseigneur et nôtre, et, depuis que avons pris les champs, avons, grâces à Notre Seigneur, recouvert les places de Montmirail , Boisruffin, Beaumont-le-Ghetif et Villebon, on pais du Perche, et, le jour de hier, au vespre, fut prise, par assault qui ne dura pas un quart d'heure, ceste ville et place de Galardon, laquelle chose pourra donner exemple à plusieurs autres ; car jà soit ce que plusieurs fois eussions fait sommer ceulx de dens de nous bailler la dite place et faire obéissance, comme ils dévoient, néantmoins, par leur mauvaiseté et félonnie, ilz se sont laissiez de tous poins détruire. Et aussi se sont cy-entour autres places mises en notre obéissance et tant que, environ Chartres, en a à présent peu qui ne nous obéissent. A. quoy nous donrons briefment bonne provision et est en notre entencion de aler
avant, au plaisir de Dieu, en notre entreprise et ces choses vous signifiions afin que vous sachez de noz nouvelles , vous priant que tousjours vueillez diligemment entendre à la repparacion, garde et hon gouvernement de notre ville de Tours, comme nous en avons en vous notre confiance, et incessamment faictes amener vivres par devers nous et en notre ost; afin que, par desfault de ce, notre compaignie qui est si grant et si notable, que piecà ne fut veue telle, ne se doye aucunement rompre ne départir. Très chiers et bien aniez, Notre Seigneur soit garde de vous. Escript en notre ost, devant Galardon, le XXVIe jour de juing.
CHARLES
VlLLEBRESME.
A noz très chers et bien aniez les gens d'église,
bourgois et habitans de notre ville et cité de
Tours.
Ces lettres ont été receues le xxviiie jour de juing m cccc et xxi.