A LA SEIGNEURIE DE VENISE

Plessis-lez-Tours, 22 janvier 1494.

André de Loredano, capitaine vénitien, a pris sur mer une barque ayant appartenu à feu Philippe Bucelly, natif de Montpellier, et fait pendre en l'île Saint-Georges les matelots qui la montaient; prière à la Seigneurie de faire faire punition dudit cas. — (Copie du temps. Arch. de Modène, Cancelleria Estense, Estera. Documend di Stati e Città.)

Charles, par la grâce de Dieu roy de France. Très chiers et grans amys, nous tenons assez memoratifz vostre seigneurie que, ou moys de may derrenier passé, nous envoyasmes par devers vous et elle nostre amé et féal conseillier et maistre d'ostel ordinaire Foucran de Loziere, chevalier de l'ordre monsieur Sainct Jehan de Jherusalem, pour vous remonstrer l'intencion et vouloir que avyons de mener la guerre contre le roy Ferrand, occupateur de nostre royaume de Napples, lequel vous a remonstré que, par ung cappitayne de vostre armée de mer, nommé André de Lordane, feu Philippe Bucelly, natif de nostre ville de Montpellier, en son vivant cappitayne d'une barche

de mer, et plusieurs autres gentilzhommes, en leurs vivans noz vassaulx et subgectz, avoient esté prins sur mer par ledict Lordane, et par luy fait pandre et estrangler à tort et sans cause en l'isle Saint Georges, prés l'isle nommée La Jassinte^ et que, non content de ce, il détient ladicte barche et plusieurs grans biens estans en icelle, montans à la valeur et estimacion de quatre vingtz mil ducatz, et que, en mespris et irreverance de nous, il avoit faict mectre ung estendart de noz armes sur le gibet où ilz avoient esté penduz, lequel il portoit sur sadicte barche de noz congié et permission, et que la moitié desdicts barche et biens luy appartiennent, et que avez différé les luy faire rendre et restituer, combien que. de ce faire il vous ait assez sommez et requis, soubz couleur que voulez dire qu'ilz estoient courcerez de mer, dont ne nous povons assez esmerveiller et sommez très desplaisans. Et, pour ce que pour riens ne vouldrions telles choses estre par nous ne vous tollerées, mays pugnition et correction estre faicte des delinquans à l'exemple de tous aultres, et nostredict conseiller et maistre d'ostel estre en ses faiz et affaires favorablement traicté et avoir ce qui luy appartient en faveur des grans et louablez services qu'il nous a faiz et fait chacun jour continuellement prés et à l'entour de nostre personne : A ceste cause, et aussi pour ce que avons esté advertiz que jamays ledict Bucelly ne fîst aucune chose contre vous ne vostredicte seigneurie, et quant ainsi seroit, ce que ne porrions bonnement croire, si ne peult raisonablement ladicte moitié des-

1. Zante ou Zacynthe, l'une des îles Ioniennes. Cf. De Maulde, Chron. de Louis XII, index v» Zante.

dicts barche et biens de nostredict conseiller estre pour ce empeschez, nous vous prions si très acertes et cordiallement que faire povons que, en faveur de nous, le plus tost et à la plus grande dilligence que faire porrez, faictes rendre et restituer à nostredict conseiller ladicte moitié desdicts barche et biens ou la juste valeur et estimacion d'iceulx, à ce que n'ayons plus cause vous en escripre. Et, sur ce, nous vueillez faire responce par nostre cher et bien amé roy d'armes de nostre ordre Clerevoye et le croire de ce qu'il vous dira de ceste matière, lequel présentement expressément envoyons pardevers vous pour plus amplement vous informer de ce et déclarer le vouloir et affection que avons en ceste matière. Et, en ce faisant, nous ferés plaisir très agréable, que recongnoistrons envers vous en cas pareil ou greigneur quant d'aucune chose nous requerrez. Très chiers et grans amys, nous prions le benoist filz de Dieu qu'i vous ait en sa saincte garde. Escript au Plesseiz lez Tours, le xxiP jour de janvier.

Charles.

DCCXLl.

A LUDOVIC SFORZA

Montils-lez-Tours, 22 janvier 1494.

Il envoie son roi d'armes à Venise avec mission de faire restituer par la Seigneurie à Foulques de Lozière les 80,000 ducats qui furent pris en mer par André Loredano sur Philippe Bucelly; prière à Ludovic de se joindre à lui pour obtenir cette restitution. — (Orig. Arch. de Milan.)

Très cher et très amè cousin, nous envoyons pre-

sentement par devers noz très chers et grans amys les duc, seigneurie et communauté de Venize nostre cher et bien amé roy d'armes de nostre ordre Clervoye, et par luy leur escripvons en faveur de nostre amé et féal conseiller et maistre d'ostel ordinaire Foucran de Loziere, chevalier de l'ordre monsieur Sainct Jehan de Jherusalem, à ce que, en faveur et pour amour de nous, ilz vueillent rendre ou faire rendre et restituer à nostredict conseiller la moictié d'une barche et biens qui estoient en ycelle, le tout montant à la somme de quatre vings mil ducatz ou environ, qui, par ung nommé André de Lordanne, soy disant cappitaine de l'armée de mer desdicts duc, seigneurie et communauté, à tort et sans cause raisonnable, a esté prinse et ravye sur mer à feu Phelippe Bucelly, lequel en son vivant estoit nostre subgect et de nostre royaume ; et icellui, ensemble grant nombre de gentilzhommes et autres gens aussi noz vassaulx et subgectz estans lors avec luy, ledict seigneur de Lordanne fist pendre et estrangler et mourir villainement et plusieurs autres grans excecrables maulx, comme plus à plain pourrez veoir par le double des lettres par nous escriptes ausdicts duc, seigneurie et communité de Venize, que vous envoyons cy dedans encloz. Et, pour ce que pour riens ne vouldrions telles choses avoir lieu et que de tout nostre cueur singulièrement desirons nostredict conseiller en ses faiz et affaires estre favorablement traicté et lesdicts biens eslre renduz et restituez à lui et aux autres à qui ilz pevent appartenir, comme raison est, tant pour consideracion des grans, louables et continuelz services que icellui nostredict conseiller nous a faiz et fait cha-

cun jour prés et à l'entour de nostre personne que autrement en plusieurs manières, nous vous prions si très acertes et de cueur que povons que, en faveur de nous, vueillez faire remonstrer les choses dessusdictes ausdictsduc, seigneurie et communitéde Venize et traicter ou estre moien avec eulx en manière que par composicion amyable lesdicts biens soient restituez à nostredict conseiller et autres qu'il appartiendra. Et, sur ce, vueillez oyr et croyre nostredict roy d'armes de ce qu'il vous dira de par nous de ceste matière, ainsi que plus à plain luy avons donné charge expresse vous informer. Et, en ce faisant, nous ferez plaisir très agréable que recongnoistrons envers vous et les vostres en cas pareil ou greigneur quant d'aucune chose nous requerrez. Très cher et amé cousin, nous prions le benoist filz de Dieu vous avoir en sa saincte garde. Donné aux Montilz lez Tours, lexxif jour de janvier ^

Charles.

A nostre très cher et amè cousin Ludovic, duc de Bar.

DCCXLII.