DE SES ORDONNANCES, A THOUARS

Monseigneur, trouvant la commodité de ce présent porteur, je vous ay bien voulu advertir que l'on m'a assuré , mesmes le payeur de vostre compaignie, que icelle vostre dicte compaignie a esté par le Roy cassée, de manière que est besoing de y donner quelque ordre : toutesfois , Mons' de Rouet (2) , vostre lieutenant, qui est en ceste court, qui a esté certioré de ce faict, je croy qu'il faict son devoir pour attendre les causes et raisons par lesquelles ladicte cassation est advenue, de quoy il vous pourra plus amplement advertir. Et craignant que ne fussiez adverty de cest affaire qui vous touche et importe, pour m'acquiter du devoir dont je vous suis tenu, et vous faire aparoir du service que je sohaite vous faire toute ma vie, j'ay bien vouleu m'esvertuer et prendre la hardiesse de vous escrire ce mot, vous suppliant, comme venant de la part de celluy qui vous a esté et sera tousjours serviteur, l'avoir pour agréable.

Et pour vous faire aparoir encores l'affection que j'ay à vostre service, je vous veulx bien aussi advertir qu'ayant entendu quelques menées qui se faisoient contre vous en ceste court, j'ay trouvé moyen d'entendre et descouvrir que l'on vous veult contraindre à bailler certaine pension à Madame vostre femme (8) et à voz enfans, chose qui vient plus par une anymosité de ceulx qui vous portent mauvaise volunté que de droit et raison qu^il y puisse avoir, ayant esgard au devoir que j'ay tousjours cogneu qu'avez faict à l'endroict de madicte dame et de voz enfans. De façon que me touchant lesdictes affaires tellement au cueur, pour le service que je vous doibtz , j'ay cherché tous les moyens que j'ay peu pour vous aller trouver et vous faire entendre de bouche les particularitez qui en ces affaires se sont passées ; mais n'ayant la comodité de me

monter d'ung cheval, c'est la cause que j'ay esté reculé de ceste bonne volunté, à mon grand regret et desplaisir.

Qui sera la cause que je vous prieray affectueusement m'en vouloir excuser pour le peu de moyen que j'ay eu de ce faire, à cause de l'inconvénient qui m'est advenu , estant ma maison enfondrée, avec une infmité d'autres affaires et incommoditez qui m'acablent et m'opressent de si près que je suis hors de tout moyen de vous faire service sans le secours de mes amys. Au reste des nouvelles de ceste court , le Roy fera , ainsi que l'on dict, son Karesme prenant en cette ville. Qui est tout ce que je vous sçaurois escrire; priant Dieu, Monseigneur, vous donner, en santé, longue et heureuse vie.

De Amboyse, ce xiiii" jour de janvier 1572.

Par le tout vostre très humble et obéyssant serviteur à jamais.