Cygnes
rv
bancquet furent perjouez encores certains fais d'Ercules, si comme quand il ala querre sa dame en enfer, etc. Audit bancquet fut on jusques à deux heures après mienuit.
Le vendredi y ot très noble assemblée sur les rens, car monseigneur de Scalles, Anglois, y vint pour ladicte jouste; mais à cause que lui et monseigneur le bastart sont frères d'armes, monseigneur Adolf de Cleves soustint le pas, dont il advint que, mondit seigneur le bastart estant en robe sur les rens regardant sondit frère d'armes, ung cop de piet de cheval lui mist très villanement le genoul hors du lieu, et ne pot faire plus avant, mais fournirent ceulx qui seront ditz.
Monseigneur de Scalles vint donc sur les rens très honnorablement, car premièrement il avoit service de tous les Anglois, et les nostres, de grant couraige, lui faisoient compagnie ; ses serviteurs estoient douze pour le lance, monseigneur Jacques de Luxembourg y est et monseigneur de Fiennes, monseigneur le marquis, les aultres Anglois, et messire Jehan de Luxembourg, portans palletos vers à une ancolie de brodure, aulcuns de damas, aultres de satin figuré ; et leurs chevaulx avoient harnas de velours tané à tout xii fleurs d'ancolies d'argent sur chascun cheval, et chascun une chainne d'or au col. Et avoit six paiges vestus de pourpoins de satin noir, mantelines de satin figuré vert, semées d'ancolies d'argent, barettes de velours noir rebracées de drap d'or cramoisy à plumes jaunes et houseaux blancs. Ledit seigneur avoit son escu de drap d'or cramoisy et bleu, houssié de drap d'or velours cramoisy et bleu; lesditz paiges, l'un
houssié de velours tané, semé de grosses campanes et grosses ancolies d'argent ; l'autre de drap d'or cramoisy velours, bordé de velours noir semé d'orfavrie blanche; le tierch de drap d'argent violet bordé de drap d'or bleu à grandes estendues de velours cramoisy semé de campanes ; l'autre de velours cramoisy semé de ses chiffres en brodure d'or, à grans estendues de drap d'argent et velours noir, semées de houpes d'or; l'autre de velours gris semé de grans pièces de drap d'or noir et de campanes d'argent; l'autre de velours bleu semé de larmes d'argent, bandé partout d'ermines, bordé de damas gris semé de ses chiffres en brodure d'or.
Item, contre lui joustant fut monseigneur de Ravenstain, houssié de velours cramoisy chargié d'orfavrie d'or et d'argent à feullages.
Le second de ce jour fut monseigneur de Roussy, lequel se fist amener sur le champ en ung très grant chastiau à quatre tours et une grosse au milieu. Et estoit le chasteau quarré de machonnerie de pierre noire, bien fait et bien garny de tout ce qu'à veue de chastiau appartient. Là dedens vint jusques sur le champ devant les dames où il sailloit dehors armé et monté. Si estoit à son devant le nayn d'Engleterre, vestu d'une robe de velours noir à ung ploy1 blanc, et quatre chevaliers qui le servirent, c'est assavoir monseigneur de Fiennes, messire Jehan de Luxembourg, monseigneur le marquis de Ferare et messire Anthoine de Halewin, vestus de pourpoins de satin cramoisy et hoctons de satin noir à ung ploy blanc.
