Antoine de Hérin

varlet, serviteur du seigneur de Bausignies, que l'on nommoit le Bourguignon, sans armeure ou aide, s'adventura et ferit son cheval des espérons, une javeline en sa main ; et si bien exploicta que du poictrail de son cheval il rompit les picques de l'ung des costez qui tenoient le bon chevallier enserré, et rompit la presse à l'entour de luy. Or advint qu'à celle rescousse le varlet, qui s'estoit si vaillamment prouvé, receut un coup sur la teste d'une masse crestelée1 et fut abatu de son cheval au millieu de la presse et receut plusieurs coups. Et quant messire Jaques veit le varlet en dangier, il se ferit au plus espès de la presse, l'espée au poing, et mit le corps et la vie en adventure pour secourir celluy qui l'avoit osté de dangier; et eust si bonne fortune que les nouveaulx chevalliers, ses compaignons, s'estoient desmeslez ; et moult bien le firent et chevaleureusement et sur tous le seigneur de Bausignies, qui avoit moult de coups receuz, et bien y parut à son cheval, qui estoit playé et navré moult durement. Si vindrent tous à celle rescousse et moult abatirent de Gantois et rescouyrent2 le varlet, qui ne fut point occiz, mais il eut moult de playes et dont il fut longuement malade3; et à celle cause, et pour le bon regnom de luy, le bon duc le retint varlet de corps en son escuyrie; et deppuis, plus de vingt ans après, il mourut contre les François devant Gorbie, archier des ordonnances, soubs ma charge, et fut tousjours tenu pour ung bon et vaillant compaignon.

Or me fault revenir au surplus de l'adventure de