Gauvain Quieret
paré de ses cheveulx beaulx et blondz, et par dessus une tocque, affulée d'ung volet moult enrichy de pierrerie ; et estoit montée sur une aquenée houlsée de soye bleue, et la menoient trois hommes à pied vestuz de manteaulx de soye vermeille, portans chapperons à cornette de soye verte, et alloient ces trois chantans une chanson faicte à propoz. Et en telle ordonnance passèrent par devant les tables et vindrent jusques devant le lieu où estoit assis mon très redoubté seigneur monseigneur le duc, et quant l'officier d'armes et les deux chevalliers luy eurent faict la révérence, ledit officier dit ce qui luy estoit enchargié en ceste manière :
L'officier d'armes :
Très excellant, hault prince et redoubté, A vous venons en toute révérence.
Pour charge avons que vous soit presanté Ce chappelet, lequel est appourté Par la dame que voyez en présence.
Le conte d'Estempes en son absance La vous transmet en ce lieu et envoyé : Et la nomme on la princesse de Joye.
Quant l'officier d'armes eust ce dit, les deux chevaliers vindrent à la dame et luy baillèrent le chappelet en ses mains, et lors les aultres trois qui l'amenoient la descendirent de sa aquenée. Si tost qu'elle fut descendue, les deux chevaliers l'adextrerent. Et adonc elle fit la reverance à mondit seigneur, et par ungz petitz degrez faictz à ceste cause, elle monta sur la table et s'agenoilla une fois sur le bord de ladicte table, et puis se mist à genoulx devant mondit seigneur, et là demoura jusques elle eust baisé ledit chappelet et mis sur le chief de mondit seigneur, qui à son relever
la baisa ; et s'en retourna ladicte dame, son emprinse achevée.
Comment monseigneur Adolfse présenta sur les rens au jour du bancquet de monseigneur pour jouster contre tous venans. — Ainsi fut présenté le chappelet à mondit seigneur le duc, par quoy il détermina le jour de son bancquet et fit moult grandes préparatoires. Au jour de ce bancquet doncques, monseigneur Adolf, qui s'estoit fait crier le chevalier au Gigne, vint après disner, de très bonne heure, sur les rens, et fut accompaigné, du lieu où il estoit armé, par mondit seigneur le duc, par monseigneur de Charrolois, par monseigneur le bastard de Bourgoingne, vestuz tous trois de robes de velours sur velours noir ; et avoient chascun ung collier d'or moult enrichiz de pierreries, comme diamans, balais et parles ; et portoit mondit seigneur une cornettes à son chapperon, si riche de pierrerie que je ne le sçay aultrement extimer, fors habillement de prince puissant.
Monseigneur Adolf, accompaigné, comme dit est, de mondit seigneur, de monseigneur de Charrolois et de monseigneur le bastard, en oultre de monseigneur d'Estampes, partit de son hostel à grant compaignie de gens vestuz de ses robes, et alloient devant ; et après eulx alloient tabourins, et après alloit un poursuyvant d'armes1, vestu d'une cotte d'armes pleine de signes, et après alloit ung grant signe merveilleusement et subtilement faict, ayant une couronne d'or au col , à quoy pendoit ung escu des plaines armes de Gleves, et à celle couronne pendoit une chaisne d'or,
