Jean Chalop, prévôt de Luxembourg

Gauvain Quieret, seigneur de Drueul, moult vaillant chevalier, et qui estoit des premiers sur le marchié. Le Lucembourgeois enferra ledit messire Gauvain au bras senestre, et luy persa le bras, et le tint longuement enferré contre une muraille; mais il fut secouru, et l'homme tué ; et demoura mort ledit prevost sur le marchié, et entrainé par une truye, qui le dévora. Et ne veiz homme mort que luy. Et disoit on que c'estoit celluy qui plus estoit cause de la rébellion faicte contre ladicte duchesse, et le tenoit on1 pour punicion divine. Le conte d'Estampes, le bastard de Bourgoingne, messire Robert de Saveuses, Charles de Rochefort, messire Thibault, bastard de Neufchastel, Guillaume de Sainct Saigne et tous les aultres cappitaines vindrent, aux grans enseignes déployez, faisant grant cry et grant noise ; et les varletz et les paiges, qui amenoient les chevaulx des eschelleurs et des gens d'armes à pied, crioient et hulloient, qui sembloit que tout le monde fust arrivé pour confondre et destruyre icelle ville. Ces choses espouventoient les Lucembourgeois et s'enfuyoient qui mieulx mieulx par la porte de la ville d'embas, qui tire à Tyonville. Et ainsi s'enfuyoient hommes, femmes et enffans, et les cappitaines et enseignes entroient à cheval par les portes, qui furent rompues et ouvertes de toutes pars. Et le conte de Glick et ses Allemans 's'estoient retraictz au chastel, comme dit est; et après eulx boutarent le feu es prochainnes maisons, devant la porte, et de ce feu brusla toute la rue, jusques à une église de Nostrc Dame qui est sur le marchié ; et bruslarent mesmes les