Monstroit

gneur de Bourgoingne, et non pas armes actaichées à espingles, mais couchées et moslées, comme l'on fait les cottes d'armes. Les cierges et les luminaires furent grans et plantureux; cinquante povres y eust, qui portoient cinquante torches ; et ne voulut souffrir le duc que nulz des seigneurs de Bretaigne, combien qu'il y en avoit assez qui estoient partiz de Flandres, portassent le deuil avecques luy; et disoit qu'il ne sçavoit nul en sa duchié qui fust souffisant pour porter le deuil de si hault prince. Et ainsi porta le deuil tout seul ; et, au partir du service, je l'alay marcier de l'honneur qu'il avoit fait à la maison de Bourgoingne; et il me respondit qu'il le debvoit bien faire. Et ainsi se passa icelluy service ; et exploictay ma charge le plus tost que je peuz, et puis repassay la mer, et m'en revins devers mon maistre.

Quant les Liégeois, ennemis de leur bonne fortune, entendirent que ceste seignorie estoit changée de père en filz, et que le duc qui si bien les avoit chastiez estoit mort, ils voulurent esprouver et assayer se leur fortune ne seroit pas meilleure à l'encontre du filz que du père; et, pour commancer leur malheur, ilz reprindrent la ville de Saintron 1 sur le duc de Bourgoingne, laquelle ville, par les traictez passez, le duc de Bourgoingne avoit retenu en ses mains, pour faire barrière entre Liège et ses pays. Et disoient iceulx Liégeois : « Pourquoy ne reprandrons nous Saintron, « qui est une des filles de Liège ?» Et le duc Charles de Bourgoingne ne se voulut point contenter d'icelle prinse 2, mais à son commancement voulut bien