HENRI DE NASSAU ET GERARD DE PLEINE AU ROI DE GASTILLE

Intelligences du marquis de Brandebourg avec le roi de France. Interception de plusieurs lettres venant de Rome. Ces lettres prouvent qu'il est urgent de faire des démarches auprès du pape. {Copie du temps,)

26 avril, àErfurt.

Sire, etc. Nous receusmes hier lettres de messire George de Emershove, lequel escript qu'il est adverty d'un prince que le marquis Joachim a fait recevoir à Strasbourg , par l'un de ses gens, de l'argent du roy de France. Il est vray que les ambassadeurs de France sont vers lui. Toutesfois nous y allons pour l'asseurer pour vous, s'il est possible, et passerons devers le duc Frederick de Saxe, et n'espargnerons point nostre peine pour vous deuement servir de nostre povoir.

Depuis nous ont esté envoyées pluiseurs lettres d'une bougette de Romme, laquelle a esté trouvée ou destroussée par ung de voz serviteurs, sans nostre ordonnance et à nostre desceu, lesquelles lettres estoient ouvertes. Nous vous envoyons les lettres du vice-chancelier, par lesquelles appert assez que le pape continue en ses practiques. Aucuns Italiens etEspaignolz se sont meslez par ci-devant de deschiffrer toutes lettres. Si avez quelc un qui en soit bon ouvrier, vous saurez de quel vouloir est sa saincteté. En ladite bougette il ne y avoit aucunes lettres ou briefs de nostredit saint-pere à ses ambassadeurs; par quoy semble que icellui vice-chancelier conduit l'affaire. Si vous le poviez gaigner, et faire que le pape peult estre asseuré et osté de suspicion,

il nous semble que le plus tost est le meilleur. Nous ne faisons doubte que vous et messieurs de vostre conseil ne savez mieulx que nous que peult valoir la faveur du pape , et auparavant et après l'élection du roy des Romains. Nous avons aussi trouvé en icellui pacquet une lettre escripte à Paris, laquelle vous envoyons. Il y avoit aussi pluiseurs griefs pour faire cesser la guerre entre le bont (ligue) et Wirtemberg, et autres lettres particulières pour le fait de pluiseurs gens.

Nous avons ouvert aucunes lettres escriptes à des marchans de Neuremberg et d'Ausbourg, affin de savoir si les François ou le pape avoient fait quelque change , et trouvons qu'il n'y est fait mencion de leur argent , ains seullement de leurs affaires.

Escript à Erfford, le xxvie jour d'avril.