LETTRE XIX

AU ROI, A MADRID

( De Guadalaxara [chez le duc de l'Infantado] , lin de novembre 1526.)

Monseigneur en ce lieu j’ay seu coume vous avez pris voslre médecine, non sans regret que je n’y ay esté, mais l’impossible me contraint à baisser la teste et supplier nostre Seigneur vous satisfaire de mon désir et devoir. Le louant de ce que l’on m’escript que vostre santé est bien , nonostant que j’entende bien quel bien c’est, car je le sens plus vivement que par lectre l’on ne le me peult desclairer. Car jusques à ce que je saiche quelle response vous aurez eue de l’Empereur, je nemepuisasseurer. Vous suppliant, Monseigneur, quoy qu’il en viengne , que vous veuillez le prendre aussy vertueusement que vous pouvez espérer en la bonté

de Dieu, qui tant et en tant d’estremité vous a aidé. Vous asseurant , Monseigneur, que j’ay en luy ferme fiance que si vous estes refusé des offres plus que raisonnaibles que vous leur faites, qu’il vous donnera grâce de trouver aultres moyens, selon vostre coumandemant, par lesquelz nous abrégerons vostre pacience. Car il n’est possible que la véhémence de. nostre pacion et affecsion , fondée sur le tort que l’on vous tient, se peust dissimuler, veu que ceux quy n’y sont obligés que pour vous avoir veu sont pacionnés pour vous, coume la bonne seur du duc ', que j’ay veue tout ce soir, qui m’a priée baiser vos pieds et mains de sa part, et qu’elle priera tant Dieu qu’il vous deslivrera. Je n’ay veu nulle de ses niepces, car la comtesse est grosse ; les aultres , malades. Mais demain , avant partir, les iray visiter; car je ne feray que quatre lieues, attendant de vos nouvelles, afin que s’il est besoing je puisse plus toust retourner à vous. Et si je ne puis, je feray si bonne diligence que j’espère en Dieu ne faillir à vous servir par aultre moyen. Le suppliant le nous donner tel à son honneur que bientoust vous puisse revoir ainsin que le desire et sans cesser veult desirer

Vostre très humble et très obéissante subjecte et seur Marguerite.

[Ms. lettre 1 1 0. ]

1 De l’Infantado. (Voyez la note i, t. I, p. ig5, et la lettre 38, P- *97- )