A MONSEIGNEUR L'EVESQUE DE THERBES

Bien que l'aveugle escrivain Tienne la première place, Les vers du liriq' thebain N'ont pourtant perdu leur grâce :

Et l'autre liriq' de Cœe, Et le haut puissant Alcée, Et le grave Stesichore, Malgré les ans sont encore.

Encor les doctes amours De la docte Lesbienne, Tesmoins de la peine sienne.

Vivent et vivront tousjours.

Bien que le grand Vandomois, Ce grand Terpandre, devance, Par le foudre de sa voix, Tous les poëtes de France, Baïf, Bellay et Jodelle Ont acquis gloire immortelle ; Et avant eux maints poëtes Avoient couronné leurs testes Du sainct verdoyant rameau.

J'espère aussi que ma muse, Eternisant la Peruse, Me vangera du tombeau.

La mort n'a point de puissance Dessus les divins espris.

Qui foudroyent l'ignorance Du foudre de leurs escris.

Les vers sont divine race, Les vers sont enfans des dieux, Les vers nous monstrent la trace Qui nous conduit jusqu'aux cieux.

Ne pense pas que les chans Qu'aux rives du Clain je chante Meurent avecque les ans, Mon prélat, car je me vante Que mon vers aura louange Jusqu'au peuple plus estrange \ Et que ma muse immortelle Rendra ma gloire éternelle, Chantant des vers autrement Que le poëte vulgaire Estimé du populaire Ne chante communément.

J'ay caché dix mille vers Pleins de grâces nompareilles, Qui ne seront descouvers Que pour les doctes oreilles.

Le vulgaire populace * Ne mérite telle grâce.

Et la grand' tourbe ignorante N'est digne qu'on les luy chante Car Apollon ne veut pas Que celuy qu'il favorise Ses vers divins profanise Les chantant au peuple bas...