DU FEU SEIGNEUR DE LANGEY
« Je ne vouldrois (dist Pantagruel continuant) n'avoir pati la tormente marine laquelle tant nous a vexez et travaillez, pour non entendre ce que nous dict ce bon Macrobe. Encores suys je facilement induict à croyre ce qu'il nous a dict du comète veu en l'air par certains jours precedens telle dicession. Car aulcunes telles âmes tant son nobles, précieuses et heroïcques, que, de leur deslogeraent et trespas, nous est certains jours davant donnée signification des cieulx. Et, comme le prudent medicin, voyant par les signes pronosticz son malade entrer en decours de mort, par quelques jours davant advertist les femme, enfans, parens et amis, du deces imminent du mary, père, ou prochain, afïïn qu'en ce reste de temps qu'il a de vivre ilz l'admonnestent donner ordre à sa maison, exhorter et benistre ses enfans, recommander la viduité de sa femme, declaii'cr ce qu'il sçaura estre nécessaire à l'entretenement des pupilles, et ne soyt de mort surprins sans tester et ordonner de son ame et de sa maison : semblablement les cieulx bénévoles, comme joyeulx de la nouvelle réception de ces béates âmes, avant leur deces semblent faire feuz de joye par telz comètes et apparitions météores. Les quelles veulent les cieulx estre aux humains pour pronostic certain et veridicque prédiction que, dedans
lOO LIVRE IV, CHAPITRE XXVII
peu de jours, telles vénérables âmes laisseront leurs corps et la terre.
« Ne plus ne moins que jadis, en Athènes, les juges Aréopagites, ballotans pour le jugement des criminelz prisonniers; usoient de certaines notes scelon la variété des sentences: par 0 signifians condemnation à mort; par T, absolution; par A, ampliation : sçavoir est quand le cas n'estoit encores liquidé. Icelles, publiquement exposées, houstoient d'esmoy et pensement les parens, amis et aultres, curieulx d'entendre quelle seroit l'issue et jugement des malfaicteurs detenuz en prison. Ainsi, par telz comètes, comme par notes etherées, disent les cieulx tacitement : Hommes mortelz, si de cestes hemreuses âmes voulez chose aulcune sçavoir, apprandre, entendre, congnoistre, prévoir, touchant le bien et utilité publicque ou privée, faitez diligence de vous représenter à elles, et d'elles response avoir; car la fin et catastrophe de la comœdie approche. Icelle passée, en vain vous les regretterez,
« Font d'adventaige. C'est que, pour declairer la terre et gens terriens n'estre dignes de la présence, compaignie et fruition de telles insignes âmes, Festonnent et espovantent par prodiges, portentes, monstres, et aultres precedens signes formez contre tout oidre de nature. Ce que veismes plusieurs jours avant le département de celle tant illustre, généreuse et héroïque ame du docte et preux chevalier de Langey, duquel vous avez parlé.
— Il m'en souvient, dist Epistemon, et encores me frissonne et tremble le cœur dedans sa capsule, quand je pense es prodiges tant divers et horrificques lesquelz vismes apertement cinq et six joms avant son départ. De mode que les seigneurs de Assier, Chemant, Mailly le borgne, Sainct Ayl, Villeneufve la Guyart, maistre Gabriel medicin de Savillan, Rabelays, Cohuau, Massuau, Maiorici, Bullou, Cercu dit Bourguemaistre, François Proust, Ferron, Charles Girard, François Bourré, et tant d'aultres, amys, domesticques et
PANTAGRUEL lOI
serviteurs du defunct, tous effrayez, se regardoient les uns les aultres en silence, sans mot dire de bouche, mais bien tous pensans et prevoyans en leurs entendcmens que de brief seroit France privée d'un tant perfaict et nécessaire chevalier à sa gloire et protection, et que les cieulx le repetoient comme à eulx deu par propriété naturelle.
— Huppe de froc, dist frère Jan, je veulx devenir clerc sus mes vieulx jours. J'ay assez belle entendouoire, voire. Je vous demande en demandant, comme le roy à son sergent, et la Royne à son enfant : Ces Heroes icy et Semidieux des quelz avez parlé peuvent ilz par mort finir? Par nettre dene, je pensoys en pensaroys qu'ilz fussent immortelz, comme beaulx anges. Dieu me le veueille pardonner. Mais ce reverendissime Macrobe dict qu'ilz meurent finablement.
— Non tous, respondit Pantagruel. Les Stoïciens les disoient tous estre mortelz, un excepté, qui seul est immortel, impassible, invisible.
« Pindarus apertement dict es déesses Hamadryades plus de fil, c'est à dire plus de vie n'estre fille de la quenoille et fillasse des Destinées et Parces iniques que es arbres par elles conservées. Ce sont chesnes, des quelz elles nasquirent scelon l'opinion de Callimachus, et de Pausanias, in Phoci. Es quelz consent Martianus Capella. Quant aux Semidieux, Panes, Satyres, SyJvains, Folletz, ^gipanes. Nymphes, Heroes et Démons, plusieurs ont, par la somme totale résultante des aages divers supputez par Hésiode, compté leurs vies estre de 9,720 ans : nombre composé de unité passante en quadrinité, et la quadrinité entière quatre foys en soy doublée, puys le tout cinq fois multiplié par soUdes triangles. Voyez Plutarche on livre de la Cessation des oracles.
— Cela, dist Irere Jan, n'est point matière de bréviaire. Je n'en croy si non ce que vous plaira. — Je croy, dist Pantagruel, que toutes âmes intellecLives sont exemptes des cizeaulx de Atropos. Toutes sont immortelles : Anges,
