DE L ABBE DE BEAULIEU LA MARCHE, QUI OSA TENIR CONTRE LE ROY

Qui pour Beaulieu le presumptueux moyne Vouldra dresser tombeau propre et ydoine, Dessus convient au vif graver ou paindre Les grans géans qui s'empescheut d'attaindre Jusques aux cieulx, pour nuyre à Jupiter, Qui promptement les faict précipiter.

Semblablement, la fable il fauldra mettre De Phaeton, soy voulant entremettre A gouverner le char du clair Phebus, Dont sa jeunesse en fin luy feit abus.

Aussi fauldra paindre sur ce tombel

L'antique histoire au beau Luciabel Et ses consors, s'eslevans contre Dieu, Dont en enfer tresbuchent d'un beau lieu.

Puis à l'entour de la tombe ainsi paincte Sera au long ceste escripture empraincte :

Seigneurs passans qui voyez tell' paincture, Geluy qui gist soubz ceste sépulture Voulut en faict ressembler à ceulx cy, Et comme à eulx luy en est prins aussi.