XV. Des Superieurs

Les hermites obeyront à un Superieur, qui soit pareillement hermite, ou autre tel qu'il playra au Reverendissime Evesque de commettre, lequel aura tout le mesme pouvoir que les ordres reformez donnent aux Superieurs. Quand il se rendra intolerable, injuste, et passionné oultre mesure, les freres conviendront par devant le Reverendissime Evesque, leur juge, ou son Vicaire-general, toutesfois sans forme ny figure de procez, mais s’accusant simplement l’un l’autre, et s’accusant pareillement sans injure, ny animosité. Les hermites se tiendront en l’obeyssance de l'Evesque, tout de mesme que les curez seront obligez de se treuver au synode diocesain, et ne resoudront rien de grand et important en leur Chapitre, sans le communiquer au Surveillant, et faire appreuver à l'Evesque.

Les hermites observeront exactement toutes ces Constitutions, pour estre dignes du sainct nom qu'ils portent, et à cet effect les reliront souvent, taschant tousjours de faire mieux; et, selon les occasions et la rayson, en requerront l’evesque, lequel s’est reservé et reserve le pouvoir d'adjouster et retrancher, selon qu'il verra estre expedient pour la plus grande gloire de Dieu.

Ces Constitutions furent leues en plein synode, et appreuvées par deux celebres docteurs en theologie, savoir, messire Pierre François Jayus, chanoine theologal et grand penitencier de l’eglise cathedrale de Sainct-Pierre de Geneve, et messire Pierre Magrin, chanoine et sacristain de l’eglise collegiale de Nostre-Dame d'Annecy; et enfin ces bons hermites firent la profession et vœux simples entre les mains de messire Louys Questan, docteur en theologie, pareillement chanoine de l’eglise cathedrale, et surveillant deputé expres par le bien-heureux François de Sales, evesque et prince de Geneve.