CHAPITRE X

QUE vostre habit ne soit point remarquable, et n’affectez pas de playre par les habits du corps; mais par les habitudes du cœur : Et que vos voiles ne soient pas si rares (2), que vos coiffures puissent paroistre au-dessous. Que vos cheveux ne soient descouverts de nulle part, affin que la nesgligence ne les laisse esparpiller, ny l’artifice ne les compose et plie au dehors.

Quand vous allez dehors, marchez ensemblement; estant parvenuës où vous allez, demeurez ensemble. En vostre marcher, en vostre sejour, ou demeure, en vostre seance (3), en tous vos mouvemens, rien ne se fasse qui attire aucun à convoitise, mais qui soit convenable à vostre saincteté, c’est-à-dire, à la saincteté de vostre vocation. :