DE LA TRES-SAINCTE MESSE, ET COMME IL LA FAUT OÙYR

1° JE ne vous ay encore point parlé du soleil des exercices spirituels, qui est le tres-sainct, sacré, et tres-souverain sacrifice et sacrement de la Messe, centre de la religion chrestienne, cœur de la devotion, ame de la pieté, mystere ineffable, qui comprend l’abysme de la charité divine, et par lequel Dieu, s'appliquant reellement à nous, nous communique magnifiquement ses graces et faveurs.

2° L’orayson faite en l’union de ce divin sacrifice a une force indicible, de sorte, Philotée, que par iceluy l’ame abonde en celestes faveurs, comme appuyée sur son bien-aymé, qui la: rend si pleine d’odeurs et suavitez spirituelles, qu’elle ressemble à une colomne de fumée de bois aromatique, de la myrrhe, de l’encens et de toutes les poudres du parfumeur, comme il est dit és cantiques. |

3° Faites doncques toutes sortes d'efforts pour assister tous les jours à la saincte messe, affin d'offrir avec le prestre le sacrifice de vostre Redempteur à Dieu son Pere, pour vous et pour toute l'Eglise : tousjours les anges en grand nombre s'y treuvent presens, comme dit S. Jean Chrysostome, pour honorer ce sainct mystere; et nous y treuvant avec eux, et avec une mesme intention, nous ne pouvons que recevoir beaucoup d'influences propices par une telle société; les chœurs de l'Eglise triomphante, et de l'Eglise militante se viennent attacher et joindre à Nostre-Seigneur en cette divine action, pour avec luy, en luy, et par luy, ravir le cœur de Dieu le Pere, et rendre sa misericorde toute nostre. Quel bonheur à une ame, de contribuer devotement ses affections pour un bien si precieux et desirable !

4° Si, par quelque force forcée, vous ne pouvez pas vous rendre presente à la celebration de ce souverain sacrifice d’une pre-

sence reelle, au moins faut-il que vous y portiez vostre cœur pour y assister d’une presence spirituelle. À quelque heure doncques du matin , allez en esprit, si vous ne pouvez autrement, en l’eglise ; unissez vostre-intention à celle de tous les chrestiens, et faites les mesmes actions interieures au lieu où vous estes, que vous feriez si vous estiez reellement presente à l'office de la saincte messe, en quelque eglise.

5° Or pour oüyr, ou reellement, ou mentalement la saincte messe, comme il est convenable : 4° dés le commencement jusques à ce que le prestre se soit mis à l'autel, faites avec lui la preparation, laquelle consiste à se mettre en la presence de Dieu, recognoistre vostre indignité, et demander pardon de vos fautes ; 2° depuis que le prestre est à l'autel jusques à l'Evangile, considerez la venuë et la vie de Nostre-Seigneur en ce monde, par une simple et generale consideration; 3° depuis l'Evangile jusques apres le Credo, considerez la predication de nostre Sauveur, protestez de vouloir vivre et mourir en la foy et obeyssance de sa saincte parolle et en l’union de la saincte Eglise catholique; 4° depuis le Credo jusques au Pater noster, appliquez vostre cœur aux mysteres de la mort et passion de nostre Redempteur, qui sont actuellement et essentiellement representez en ce sainct sacrifice, lequel, avec le prestre et avec le reste du peuple, vous offrirez à Dieu le Pere, pour son honneur et pour vostre salut ; 5° depuis le Pater noster jusques à la communion, efforcez-vous de faire mille desirs, de vostre cœur, souhaittant ardemment d’estre à jamais joincte et unie à nostre Sauveur par amour eternel ; 6° depuis la communion jusques à la fin, remerciez sa divine Majesté de son incarnation, de sa vie, de sa mort, de sa passion, et de l'amour qu'il nous tesmoigne en ce sainct sacrifice, le conjurant par iceluy de vous estre à jamais propice, à vos parens, à vos amis, et à toute l'Eglise, et vous humiliant de tout vostre cœur, recevez devotement la benediction divine que Nostre-Seigneur vous donne par l'entremise de son officier.

Mais si vous voulez pendant la messe faire vostre meditation sur les mysteres que vous allez suivant de jour en jour, il ne sera pas requis que vous vous divertissiez à faire ces particulieres actions, ains suffira qu'au commencement vous dressiez vostre intention à vouloir adorer et offrir ce sainct sacrifice par l’exercice de vostre meditation et orayson, puis qu’en toute meditation se trouvent les actions susdites, ou expressement, ou tacitement et virtuellement.