LIVRE I

Plein de menace & d'esperence estrange, Meslant un blasme avec une louange, Qui de frayeur les faisoit émouvoir Et dueil ensemble & plaisir concevoir.

En-cependant la jeunesse Troyenne Haut invoquant la Berecynthienne ' Toute ravie en son nom immortel D'encens fumeux honoroit son autel :

Les uns avoient leurs perruques couvertes D'un large pampre aux grandes fueilles vertes, Aux nœuds retors, des Zephyres souflez : Les uns frapoient les tabourins enflez, Les uns au son de la flutte persée Fouloient la terre, autres fols de pensée Comme agitez de fureur sauteloient, [lé]

Autres chargez de grands bouclers baloient Un branle armé, autres de voix aiguës Faisoient sonner les forestz chevelues Et retentir les rochers d'alentour.