EXCELLENTE MEDITATION ET CONSIDERATION QUATRIESME

CHAP. XIII

Considérez l'amour avec lequel Jésus Christ nostre Seigneur a tant souffert en ce monde, et particulièrement au jardin des Olives, et sur le mont Calvaire. Cet amour vous regardoit, et par toutes ces peines et travaux obtenoit de Dieu le Père des bonnes resolutions et protestations pour vostre cœur, et par mesme moyen obtenoit encor tout ce qui vous est nécessaire, pour maintenir, nourrir, fortifier, et consommer ces resolutions. O resolutions que vous estes précieuses, estant fille d'une telle mère, comme est la passion de mon Sauveur ! ô combien mon ame vous doit chérir, puis que vous avez esté si chères à mon Jésus? Helas ô Sauveur de mon ame, vous mourustes pour m'acquerir mes resolutions, he faittes moy la grâce que je meure plustost que de les perdre.

Voyez vous, ma fille, il est certain que le cœur de nostre cher Jésus voyoit le vostre dés l'arbre de la Croix et l'aimoit, et par cet amour luy obtenoit tous les biens qu'il aura jamais, et entre autres nos resolutions : vray ma fille , nous pouvons tous dire comme Hieremie ; O Seigneur, avant que je fusse vous me regardiez, et m'appelliez par mon nom, d'autant que vrayement sa divine bonté prépara en son amour et miséricorde tous les moyens généraux et particuliers de nostre salut, et par conséquent nos resolutions. Ouy, sans doute, comme une femme enceinte prépare le berceau, les linges et bandelettes, et mesme une nourrice pour l'enfant qu'elle prétend faire, encore qu'il ne soit pas au monde; ainsi, ma chère fille, nostre Seigneur ayant sa bonté grosse et enceinte de vous, prétendant de vous enfanter au salut, et vous rendre sa fille, il prépara sur l'arbre de la Croix tout ce qu'il falloit pour vous, vostre berceau spirituel,

Edition Princeps. Partie III. Chap. xiiii. 179*

vos linges et bandelettes, vostre nourrice, et tout ce qu'il falloit pour vostre bon-heur. Ce sont tous les moyens, tous les attraits, toutes les grâces avec lesquelles il conduit vostre ame, et la veut tirer à sa perfection. Or nostre Seigneur estoit en estât de grossesse et de femme enceinte sur l'arbre de la Croix.

Ah mon Dieu, que nous devrions profondement mettre cecy en nostre mémoire ! Est il possible que j'aye esté aymé et si doucement aymé de mon Sauveur, qu'il allast penser en moy, en mon particulier, en toutes ces petites occurrences, par lesquelles il m'a tiré à luy : et combien doncques devons nous aymer, chérir, et bien employer tout cela à nostre utilité ? Cecy est bien doux ; ce cœur amiable de mon Dieu pensoit en Philothee, l'aymoit et luy procuroit mille moyens de salut, autant comme s'il n'eut point eu d'autre ame au monde en qui il eut pensé ; ainsi que le Soleil esclairant un endroit de la terre, ne l'esclaire pas moins que s'il n'esclairast point ailleurs, et qu'il esclairast cela seul. Car tout de mesme nostre Seigneur pensoit et soignoit pour tous ses chers enfans : en sorte qu'il pensoit à un chacun de nous, comme s'il n'eust point pensé à tout le reste. Il m'a aymé, dit S. Paul, et s'est donné pour moy : comme s'il disoit, pour moy seul, tout autant, comme s'il n'eut rien fait pour le reste. Cecy, ma fille, doit estre gravé en nostre ame, pour bien chérir et nourrir une resolution, qui a esté si pretieuse au cœur du Sauveur.