XVII

De mesme source procède la fréquence des esvocations , tant en matière civile que criminelle , lesquelles sont cause d'une ruyne indicible de plusieurs paulvres personnes qui, tirées de leur ressort, n'ont pas le moyen de fournir aux fraix de justice, faire les voyages nécessaires, et poursuyvre leurs droicts , de manière qu'ilz ayment aultant quitter tout ; et, en ce caz, ceulx qui ont maulvaise cause , qui sont ordinairement les évoquans , en ont bon marché ; et , quant aux criminels, ilz eschappent subtilement des mains de la justice, pour avoir affaire à des partyes qui n'ont les reins assez forts, et quelquefois à deux cents lieues de leurs maisons , la vengeance d'ung assassinat , ou aultre crime énorme , qui , par le moyen de telles esvocations, demeure souvent impuni, faulte de partye et de vive pour-

3oO TRAITÉ

suyte , dont arrive peu après de grands malheurs èz provinces , parce que les enfans , ou les héritiers des assassinez deviennent grands, et veoyant que l'on ne leur a poinct faict de justice , se la font eulx - mesmes , se vengent en toutes les façons qu'ilz peuvent , du meurtre ou de l'assassinat de leur père ou parent ; et par telles mauvaises procédures , s'enfilent plusieurs massacres , désolations, ruyne de maison, qui ne seroit pas, si le premier eust esté puny comme il debvoit, et qu'il feust demeuré en la justice ordinaire ; au moyen de quoy seroit fort nécessaire , pour obvier à tant de désordres, praticquer exactement les esdicts de Chanteloup , de la Bourdazière, de Moulins, article septante deux, et nommément celuy de Blois (i), article nouante sept.