CHAPITRE LXXX

Comment le duc fut solempnement reçu à Gand.

Or vint le jour assigné, et party le duc de Bruges par un samedy et alla gésir à Heclo' en my-voye, et le lendemain, par un beau dimence, moult cler et attrempé, après sa messe et avoir disné légièrement, monta à cheval et se mist en chemin, tousjours tirant vers sa ville, là où infinité de peuple avoit par les champs et par les chemins là où il passoit. Tous variés et portans bagages allèrent devant prendre les logis de leurs maistres, et ne demora riens entour de la personne du prince que nobles hommes et environ deux cens archers vestus de ses palletos, aucuns de brigandines, aucuns point, mais tous sallades en teste, et l'arc et la trousse, bien montés et gentement en point. Y avoit de grans seigneurs à l'entour de lui grant nombre, comme le conte d'Estampes, messire Adolf de ClèveSjle bastard de Bourgongne, le seigneur de Croy, son frère messire Jehan, le mareschal de Bourgongne, le seigneur d'Antoing, le seigneur de Créqui, le seigneur de Lalaing, messire Simon de Lalaing, messire Sanse de Lalaing, beaucoup de grans barons deBrabantet de Haynau, de Hollande une quantité, de Picardie aussi grant foison, et toute la fleur de la chevalerie de Flandres, N'y avoit nuls prestres, neprélas en celle route, ne clercs, ne secrétaires. Tous estoient allés devant en la ville voir et visiter les mistères et les divers personnages qui y estoient et dont les somptuosités et les magnificences estoient grandes et

' Eecloo.

de merveilleux coust. Les notables et nobles de la ville alloient au-devant de lui en très-grant nombre, tous vestus de noir comme g-ens eux humilians et recognoissans leurs fautes passées, et venus devant lui enmy les cliamps, descendirent à pié ceux qui à ce estoient députés, et lui firent la révérence avec la présentation des clefs de toutes leurs portes, et ce fait, se remirent devant et le conduisirent jusques dedensla ville, là où à la première porte il trouva des personnages moult beaux et de grant entendement, tous servans à proupos. Trouva la porte toute couverte richement de haut en bas de draps de laine , et iceux enrichis de diverses beautés, et de là en avant toutes les rues tendues de drap rouge à deux lez, et sur le haut du charpentage avoit les torches allumées tout en ranc jusques à l'entrée de sa maison, qui dure bien un grant quart de lieue par là où il alla, ou plus, et sur les draps avoit escrit en grosses lettres argentées : Veni nohis, 'pacijicus dominns ; iitere servitio nostro, sicut ^ilacuerit tihi, etc., qui vaut à dire en françois : « Viens « devers nous, paisible seigneur, et comme il te plaira, « use de nous et de notre service. » Et est celui mot que les peuples de diverses régions et cités dirent à Olofernes quant tramis du grant roy Nabugodonosor, il fit esternir la terre devant sa face. Et passant ainsi par divers quarefours et rues, avoit diversité de personnages aussi croissans et multiplians en beauté et richesse et servans tousjours à proupos pris de matères prises en la ville, puis es histoires romaines et ailleurs, aucuns aussi faits par nouvelle fiction à leur entendement, que tout œil qui les vit prisa par merveilles. On vint après à la porte seconde là où il y avoit un grant ciel devant, et tout le front d'icelle depuis le sommet du toit jusques nu bas de la terre estait;

iU CHRONIQUE

armoiédes armes de tous les chevaliers de l'ordre, qui moult estoit riche chose à voir et de graiit labeur en la manière que faite estoit, ettousjours passant outre et trouvant personnages et solempnités de plus en plus fort, trouva ce qui ne seroit point à dire sans y mettre grant temps et grans languages, car y avoit choses merveilleuses et non jamais vues ailleurs, bien entendu toutevoies que toutes les fenestres estoient pleines de dames et de damoiselles par tant et tel nombre que l'œil à peine pouvoit mettre choix entre elles, tant en y avoit et de si drues. On vint à passer après un grant pont au travers de la rivière du Lis emprès la boucherie là où on trouva les chevaliers de mer, nageans en l'eaue et combattans l'un contre l'autre, les seraines de mer pareillement, toutes nues et échevelées ainsi comme on les peint, et au droit milieu de la rivière une grant nef richement estoffée par en bas de tapisserie et de tous paremens d'hostel, un haut dressoer eslevé sur le chasteau d'arrière, plein de riche vaisselle, et devant icelui nombre d'aucunes belles pu celles qui faisoient leur personnage aux passans. Ladite nef par dehors estoit toute couverte de vert drap, et au fons du bateau par dehors tout à l'entour avoit assis deux cens torches toutes allumées qui ardoient en l'eaue, et sur le bort d'icelui autant pareillement qu'on y en pouvoit planter. Le mast estoit dressé tout au milieu atout sa hune, dont le cordage estoit remply de torches tout partout', et la hune tant pleine que ce sambloient estoiles du ciel, et avoit au milieu de ce mast pendu un escu armoyé des armes du duc et celui tant plein de torches pareillement que tout le bateau sambloit estre en feu. Avoit trompettes et clairons dedens qui faisoient retentir la rivière par merveilleuse mélodie. Brief onques telle nef n'avoit esté vue, ni de telle mission ,

ni richesse. Avoit là emprès une maison toute couverte, toit, muraille, huis et fenestres jusques en terre, d'or reluisant, et depuis le haut jusques en bas toute pleine de torches verdes. La boucherie qui est grande et spacieuse, estoit tant pleine de torches que l'on ne vit onques telle chose ; tout le marché du poisson, tant décoré et tant plein de riches paremens et de personnages et de torches que à dur se pourroit réciter tout sinon en gros ; tout le marché du Vendredi pareillement et si bien là où on ne passoit point que là où on passoit; le beaufroy, plein de torches allumées, lequel se voioit bien par nuit en aucuns endroits de cinq et de six lieuesloings, et sambloit estre tout en feu par la hauteur et grosseur de lui, car est un gros ancien édifice, et y avoit feu dessus allumé toute la nuit et trois jours après et tout partout ailleurs; et en cest estât trouvant tousjours plus et plus de merveilles et de hautes solempnités qui ne sont point à escrire de légier et dont trop en avoit, vint jusques à son hostel là où il descendy et se trouva à sa paix et à son aise et fit moult grant chière celui soir, et vinrent arrière les seigneurs de la ville lui faire les présens de vins et d'autres gratuités bien honnestes. Celle nuyt fit-on tout au long de la ville les plus somptueux feux qui onques avoient esté vus jusques à ce jour; et se continuèrent les allumeries des torches tout partout jusques au jour, et le lendemain par renvy l'un sur l'autre encore en celuymesme estât, et le tiers et le quart jour jusques au vendredi que tousjours faisoient festes et alumeriesles mestiers l'un contre l'autre, les rues et voisinages pareillement par renvy l'un sur l'autre et tousjours tables mises en pleines rues, vins et viandes dessus à tous venans comme si riens ne coustassent, et chantoient et dansoient femmes et hommes, jouoient jeux de personnages, et faisoient de la nuyt

jour et le jour exploitèrent en celuy-mesme usage. Tous vivres estoient mis au plus bas marchié qu'on les pouvoit establir, nul si hardy de les enchérir d'un denier, ni qui à liomme de court must noise, ni question sur peine de mort. Velà la trayson et le malice que Gantois machinoient à l'encontre de leur prince, qui tournoit en telle jocundité et en telle amour et honneur. Le mareschal du dauphin, nommé le bastard d'Ermignac, estoit toujours emprès le duc à l'heure de son entrée, et l'avoit là envoie le dauphin son maistre pourvoir tout avec aucuns autres seigneurs et gentilshommes de son hostel, mais celui et iceux tous s'esmerveillèrent et se signèrent du grant et merveilleux fait de ceste entrée et de la très -merveilleuse richesse et puissance de ceste ville, disans qu'en tout le monde n'avoit esté vu tel cas, ne telle pompe, ne telle excellence pour une ville qui estoit l'outrepasse de toutes les autres. Sy fut le duc celle première nuytsi asseuré et si à sa paix d'estre là que lui troisième ou quatrième alla voir et visiter les feux et les festes tout partout, dont le peuple se laissa cheoir en terre de joie et baisoit les marches de ses pies, lui souhaidant à haute voix toutes les joies et prospérités des cieux et toutes les félicités que Dieu donne aux hommes, et fut festoie en divers lieux à souper, et une fois entre les autres en l'hostel de la ville le plus excellentement qu'onques prince fut en lieu où il se trouvast, entremy toutes les dames de la ville, dont le nombre n'a point de conte, et là se firent les entremets de diverse manière, tant beaux et tant riches qu'onques jusqu'à ce jour n'avoient esté vus paraux pour mission de ville'.

' Cf. la relation fort détaillée donnée par Jean Chartier, t. III. p. 80, et celle du continuateur de Monstrelet, p. 7.5, v.

DE ClIASTELLAIN. 417