RONDEAU CCLXXXV

N'oubliez pas vostre manière !

Non ferez vous, je m'en fais fort, Ennuy, armé de Desconfort, Qui tousjours me tenez frontière.

Venez combatre à la barrière, Et faittes acoup vostre effort.

N'oubliez pas vostre manière !

Non ferez vous, je m'en fais fort.

Quant mettez sus vostre bannière, Cueurs loyaux guerriez si fort Que les faittes retraire ou fort De Douleurs, à piteuse chiere.

N'oubliez pas vostre manière!

RONDEAU CGLXXXVI.

Chiere contrefaitte de cueur, De vert perdu et tanné painte, Musique notée par Fainte, Avecques faulx bourdon de Maleur!

Qui est il ce nouveau chanteur, Qui si mal vient à son attainte ?

Chiere contrefaitte de cueur, De vert perdu et tanné painte.

Je ne tiens contre, ne teneur, Enroué, faisant faulte mainte.

Et mal entonné par Contrainte ; C'est la chapelle de Douleur, Chiere contrefaitte de cueur.