XCI. — BALADE

Are ne vuet et ma dame ne deingne

Que je soie garis de ma dolour Et si me font amer, comment qu'il preingne, Celle qui ha plus qu'autre de douçour.

Mais trop petit en y truis,

Car tant amer ne servir ne la puis Que sa douçour vueille seur moy estendre ; Et si ne puis fors qu’à s’amour entendre.

Si qu’en mon vis en porte tele enseingne Que tainte en est et pale ma coulour, N'il n’est confors ne joie qui me veingne De nulle part, eins langui en paour

Que je n’en soie destruis ; Car son cuer est à moy grever si duis Que le mien, las ! fera crever ou fendre ; Et si ne puis fors qu’à s’amour entendre.

Amours ne vuet que de mes maus me pleingne, Einsois me fait conjoïr mon labour, Ne je ne sçay comment m'ardeur esteingne.

Car vrais desirs l’esprent et fine amour ; Ne ma dame des anuis, Qui ont en moy fait morir tous deduis, Ne deigne avoir son cuer piteus n’entendre ; Et si ne puis fors qu’à s’amour entendre.