Recueil curieux de pièces originales, rares ou inédites, en prose et en vers, sur le costume et les revolutions de la mode en France, pour servir d'appendice aux Costumes historiques de la France;

Item. Nul bourgois ne bourgoise , ne portera vair, ne gris, ne ermines, et se délivreront de ceux que ils ont, de Pâques prochaines en un an. 11 ne porteront, ne pourront porter or , ne pierres précieuses , ne couronnes d'or , ne d'argent.

Item. Nul clerc, se il n'est prélat, ou establis en personnage, ou en dignité, ne pourra porter vair, ne gris, et ermines, faits en leurs chapperons tant seulement.

Item. Li duc , li comte , li baron de six mille livres de terre, ou de plus, pourront faire quatre robes par an et non plus, et les femmes autant.

Item. Nuls chevaliers ne donra à nuls de ses compagnons, que deux paires de robes par an.

Item. Tous prélats auront tant seulement deux paiz'es de robes par an.

Item. Tous chevaliers n'auront que deux paires de robes tant seulement, ne par don, ne par achat, ne par autre manière.

Item. Chevaliers, qui aura trois mille livres de terre, ou plus, ou li bannerets, pourra avoir trois paires de robes par an, et non plus, et sera l'une de ces trois robes pour esté.

Nuls prélats ne donraà ses compaignons, que une paire de robe l'an, et deux chappes.

Nuls escuiers n'aura que deux paires de robes , par don ne par achat, ne en nulle autre manière. Garçons n'auront qu'une paire de robe l'an. Nulle damoiselle, si elle n'est chastellaine , ou dame de deux mille livres de terre, n'aura qu'une paire de robe par an.

Nuls bourgois, ne bourgoise, ne escuier, ne clerc, se il n'est en prelation , ou en personaige , ou en greigneur estât, n'aura torche de cire.

Nuls ne donra au grand mangier, que deux mes, et un potage au lard, sans fraude. Et, au petit mengier, un mes et un entremés. Et, se il est jeûne, il pourra donner deux potages aux harens, et deux mes , ou trois mes , et un potage. Et ne mettra en une escuelle, que une manière de char, une pièce tant seulement , ou une manière de poisson , ne ne sera autre fraude. Et sera comptée toute grosse char pour mes, et n'entendons pas que fromage soit mes, se il n'est en paste, ou cuit en yaue.

II est ordoné, pour déclarer ce que dessus est dit des robes, que nuls prélats, ou barons tant soient grans, en puisse avoir robe, pour son corps, de plus de vingt et cinq sols tournois l'aune de Paris.

Les femmes de barons à ce feur.

Li comte et li baron ne pourront donner robes à leurs compaignons, de plus de dix-huit sols l'aune de Paris.

Li bannerets et li chastelain ne pourront avoir robes, pour leur corps, de plus de dix-huit sols tournois l'aune de Paris, et leurs femmes à ce fcur. Et pour leurs compaignons, de quinze sols l'aune de Paris.

Les escuiers , fils de barons , bannerets et chastelain ne pourront avoir robes de plus grand prix de quinze sols tournois de Paris.

Prélats, comtes, barons, banerets et chastelain ne donront robes à leurs escuiers, de plus de sept sols ou de six sols l'aune de Paris.

Les autres escuiers qui ne sont de mesnage , et se vestent de leur propre, ne pourront faire robe de plus de dix sols tonrnois l'aune.

Clers qui sont en dignitez, ou en personaiges , ne pourront faire robes, pour leurs corps, de plus de seize sols tournois l'aune de Paris, et, pour les compaignons, de douze sols tournois l'aune.

Clercs qui ne sont en dignitez , ne personnages, fils de comtes, barons, bannerets ou chastelins, ne pourront faire robe de leur corps, de plus de seize sols l'aune, et, pour leurs compagnons ou pour leurs maistres, de dix ou douze sols tournois tout au plus l'aune.

Les autres clercs, qui font robe du leur, ne pourront faire robe pour leur corps , de plus de douze sols six deniers l'aune, Et, s'il est chanoine d'église cathédrale, il pourra faire robe de quinze sols tournois l'aune, et non plus.

Bourgeois qui auront la value de deux mille livres tournois, et au-dessus, ne pourront faire robe de plus de douze sols six deniers tournois l'aune de Paris.

Et leurs femmes, de seize sols au plus.

Les bourgois de moins de value ne pourront faire de robe de plus de dix sols tournois l'aune, et pour leurs femmes, de douze sols au plus.

Et sont ces ordonnances commandées à garder , aux ducs, aux comtes, aux barons, aux prélats, aux clercs, et à toutes manières de gens du royaume, qui sont en la foy, sur celle foy qu'ils sont tenus. En telle manière que li ducs, li comtes , li bers , li prélats , qui fera contre ceste ordonance, paiera cent livres tournois pour paine. Et sont tenus

à faire garder cest establissement à leurs sujets , en quelque estât qu'ils soient, et en telle manière que, si aucun banneret fait encontre, il payera cinquante livres tournois, et li chevalier ou vavasseur, vingt cinq livres tournois, et les doiens, et les arcediacres, les prieurs, et les autres clercs qui ont dignité, ou personaige, soient de siècle , soient de religion, quiconque sera encontre, il paiera cent sols, aussi comme l'autre ; et les amendes de toute manière de gens lays, qui pour cette achoison de cest establissement seront levées, seront aux seigneurs, en qui terre, ou en qui seigneurie li fourfait seront fait, soient li seigneur clerc , ou lays, et les amendes des clercs, en quelque estât que il soient, seront à leurs prélats, ou à leur souverain. Et en telle manière, que cil, par qui li fourfait vendra à la connoissance du seigneur, aura le tiers de l'amende. Et se il avenoit qu'aucun clercs ou lais , de quelque condition que il fust, accusez que il eust fait contre cette ordonance, et il s'en vouloit purgier par son serment , en la manière que chascun a accoustumé à jurer, il en seront creus, et seront quittes de la peine. Et se purgera chascun , soit clercs ou lays, qui de cest chose se voudra purgier. Ce fut fait et ordonné à Paris l'an de grâce 1294.

Sic reperitur in quodam parvo libro CamerseCompotorum pro tranquille statu regni.