TITRE XXIX

Des Patenotriers d'ambre et de gest.

Il est accordé entre les mestres patrenostriers d'ambre et de gest a que il ne ouvreront james de nuiz des dites patenostres , ne au jours de festes foirables, ne au samedi auprès none, ne à vegile jeunable; et que l'en ne ouvrera les veilles de festes et les samediz fors jusques à none, et tant come elle sonnera.

Et que il ne pourront prendre nuz aprantiz à meins de x ans, et à xl s. , et ne pourront prendre que ij.

Et se il s'en vont ains 3 leur servise parfet, le mestre ne pourra prendre nul autre devant que il aura fet son terme.

Et que nus ne puisse vendre son aprantiz se il ne va outremer, ne louer varlet ne bailler à ouvrer tant come il doie servise ne argent à son mestre , se ce n'est par la volenté de son mestre.

Et se nuz vient d'estrange pais pour ouvrer, que il soit justicié 4 par le prevost de Paris à tenir les ordenances desus dites par son serment avant que il puisse ouvrer.

Et qui ira contre ceste ordenance, il paiera v s. au Roy, et trois solz au gardes du mestier.