III. — Rouen, 11 juin

Déclaration d'experts au sujet de la valeur d’un jardin sis près de la tour carrée du château de Rouen, au hameau de Bouvreuil, et qui est grevé d’une rente de 21 sous au profit du roi. (BiB., NAT., Français 26043, n° 5379. Original ; fragment de sceau en cire verte.)

A tous ceulz qui ces presentes lettres verront ou orront Gaultier de Beauchamp, chevalier, baïlli de Rouen, salut. Savoir faisons que aujourd’huy se comparurent personnelement par devant nous Colin du Boulay, le jeune, Rogier Roussel, Guillaume des Fresnes, Thommas le Doulx, Jehan de Bessin, Louys Bernart et Pierres Blosset, lesquelx nous tesmongnerent que par la contrainte de Jehan Fautrel, sergent a mace de Rouen, ilz s’estoient transportez en sur certain heritage ou gardin assiz au près de la tour carrée du chastel de Rouen ou hamel de Bouvereul, d’un costé le pavement de Barsot, d’autre costé et d’un bout les murs des fossés du chastel en venant à la tour carrée, d’un bout et d’un costé a Pierres Ogier, icelui heritage nagaiïres appartenant a feu Pierres Guillebert et sur lequel le Roy nostre souverain seigneur a droit de prendre et avoir vingt et ung soulx de rente par an, et nous affermerent les dessus dis que ledit heritage estoit de present en non valoir tant par ce que les arbres d’icelui jardin et mesmes la closture avoient esté demoliz et abatus a l’occasion du siege naguères estant devant ladicte ville de Rouen comme parce que de present le Roy nostredit seigneur avoit fait et ordonné le chemin de l’yessue du chastel par devers les champs en et par dessus ledit heritage ou jardin, comme aussi pour ce que icelui heritage est de present occuppé des pierres et de pluseurs autres matieres neccessaires a la reffeccion et emparement de l’yessue dudit chastel et de ladicte tour carrée, desquelles

choses de la partie des heritiers et deguerpie d’icelui deffunt ces presentes lettres nous ont esté requises, lesquelles en tesmoing de ce nous avons scellées du scel aux causes dudit bailliage. Ce fu fait et donné à Rouen le xi° jour de juing l’an de grace mil iïijt et dix neuf. Signé H. Lancestre (1).