BALLADE DE BON TEMPS

Or qui m’aymera si me suyve !

Je suis Bon Temps, vous le voyez;

En mon banquet nul n’y arrive Pourveu qu’il se fume ou estrive,

Ou ait ses espritz fourvoyez :

Gens sans amour, gens desvoyez je ne veulx, ne ne les appelle,

Mais qu’ilz soient gectez à la pelle.

Je ne semons en mon convive Que tous bons rustres avoyez ;

Moy, mes supportz, à plaine rive Nous buvons, d’une façon vive,

A ceulx qui y sont convoyez.

Danceurs, saulteurs, chantres, oyez, je vous retiens de ma chapelle,

Sans estre gectez à la pelle.

Grongnars, fongnars, hongnars, je prive, Les biens leur sont mal employez ;

Ma volunté n’est point rétive,

Sur toutes est consolative,

Frisque, gaillarde, et le croyez;

Jureurs, blasphémateurs, noyez ;

S’il vient que quelcun en appelle Qu’il ne soit gecté à la pelle.

Prince Bacchus, telz sont rayez,

Car d’avec moy je les expelle ;

De mon vin clairet essayez,

Qu’on ne doibt gecter à la pelle.

Clément Marot.