DE CRACHER ET BAVER

Par cracher et bauer se fait aussi grande euacuation : ce qu’on voit par experience à plusieurs qui ont eu aposteme aux costes, nommée pleuresie, alors que la suppuration est faite, la sanie est iettée par la substance rare et spongieuse des poulmons, et delà conduite par la trachée artere en la bouche. Et quant au bauer, il est bien manifeste que les pauures verollés se purgent par iceluy, comme aussi par le cracher.

Or on pourra prouoquer le cracher et bauer auec masticatoires faits de racine d’iris, et de pyrethre, mastic, et autres semblables : aussi en tenant dedans la bouche et gargarisant, mucilage de semence de lin.

PESTE