CHAPITRE XXm

Comment le conte d'Estampes et le bastard Anthoine de Bonrgongne conduisirent lears gens d'armes en Hollande.

Or ne vouloient cestes gens d'Utrecht, les Brederode, le seigneur de Montfort et les autres, venir à nulle raison, ne eux souffrir mener à nulle voye de paix qui ne fust toute à leur bel, par quoy il y convenoit aller en la fin par voye de fait, car autrement, ce vit-on bien, on ne les auroit point. Or estoient les gens d'armes encore par deçà la mer en Picardie et s avançoit fort la saison, car jà estoit my-juillet. Sy furent mandés y celles gens d'armes et escrit-on au conte d'Estampes et au bastard que on les fist avancer. Sy le firent ainsi lesdits seigneurs et mirent aux champs leurs gens, dont la compagnie estoit fière et moult belle et bien pour faire un grant esploit là où ils eussent été mis en œuvre. Car y avoit de nobles et hauts seigneurs capitaines et meneurs, la fleur toute de Picardie, de Flandres et de Haynau, et n'y avoit celuy qui ne se estoit mis sur le bon bout pour soy monstrer en pays d'ennemy estrange entre les Allemans. Sy n'y avoit que quatre capitaines principaux, deux grans : c'estoient le conte d'Estampes et le bastard et deux autres dessous eux, dont l'im estoit le seigneur de Sempy, fils aisné de messire Jehan de Croy, et l'autre messire Anthoine Rolin, seigneur de Hémeries, fils du chancelier, qui se portoit dessous le bastard, et avoit une moult belle compagnie de gens d'armes

D£ CHASTELLâlN. i2i

et de trait, de laquelle compagnie, pour ce que ainsi la transporta dessous ledit bastard et délaissa le conte d'Estampes dont il avoit la sœur de sa femme*, il lui en vint mal depuis, et de celle heure en avant acquist indignation et murmures contre luy, qui depuis se descouvrirent et lui tournèrent à très-dur et annoyeuse conséquence, comme vous orez ci-après en son lieu, mais pour venir aux gens d*armes mandés, ils passèrent parmy le pays de Brabant tout au long de la Campine et s'allèrent rendre au Bos-le- Duc, et de là en passant aucunes grosses rivières qui y aont, se vinrent rendre au pays d'Utrecht là où ils surattendirent le duc jusques à sa venue, qui guères ne la fit longue après.