Ballade LVI

Mon bel ami, je voy trop bien
De vray, quel que le semblant soit,
Que vostre cuer ne m’aime en rien.
4Bien borgnes est qui ne le voit ;
Vous le dites quoy qu’il en soit,
Mais c’est tout pour moy faire pestre,
7Car l’œuvre loe le maistre.
Il appert a vostre maintien
Comment vo cuer d’amer recroit ;
Car tout un moys, si com je tien,
11De moy veoir ne vous chauldroit.
Que m’amissiez qui le croiroit ?
Certes, ce ne pourroit estre,
14Car l’œuvre loe le maistre.
Dont trop pour fole je me tien,
Et aussi chascun m’i tendroit,
De vous amer ; car nesun bien
18De ce venir ne me pourroit,
Puis qu’en riens ne vous en seroit,
Et j’aperçoy trop bien vostre estre
21Car l’œuvre loe le maistre.