CHAPITRE VI.

_L'heure des parlemens dangereuse._

TOVTES-FOIS ie vis dernierement en mon voysinage de Mussidan, que ceux qui en furent délogez à force par nostre armee, et autres de leur party, crioyent comme de trahison, de ce que pendant les entremises d'accord, et le traicté se continuant encores, on les auoit surpris et mis en pieces. Chose qui eust eu à l'auanture apparence en autre siecle; mais, comme ie viens de dire, nos façons sont entierement esloignées de ces regles: et ne se doit attendre fiance des vns aux autres, que le dernier seau d'obligation n'y soit passé: encores y a il lors assés affaire. Et a tousiours esté conseil hazardeux, de fier à la licence d'vne armee victorieuse l'obseruation de la foy, qu'on a donnee à vne ville, qui vient de se rendre par douce et fauorable composition, et d'en laisser sur la chaude, l'entree libre aux soldats. L. Æmylius Regillus Preteur Romain, ayant perdu son temps à essayer de prendre la ville de Phocees à force, pour la singuliere proüesse des habitants à se bien defendre, feit pache auec eux, de les receuoir pour amis du peuple Romain, et d'y entrer comme en ville confederee: leur ostant toute crainte d'action hostile. Mais y ayant quand et luy introduict son armee, pour s'y faire voir en plus de pompe, il ne fut en sa puissance, quelque effort qu'il y employast, de tenir la bride à ses gents: et veit deuant ses yeux fourrager bonne partie de la ville: les droicts de l'auarice et de la vengeance suppeditant ceux de son autorité et de la discipline militaire. Cleomenes disoit, Que quelque mal qu'on peust faire aux ennemis en guerre, cela estoit par-dessus la Iustice, et non subiect à icelle, tant enuers les Dieux, qu'enuers les hommes: et ayant faict treue auec les Argiens pour sept iours, la troisiesme nuict apres il les alla charger tous endormis, et les défict, alleguant qu'en sa treue il n'auoit pas esté parlé des nuicts: mais les Dieux vengerent ceste perfide subtilité. Pendant le parlement, et qu'ils musoient sur leurs seurtez, la ville de Casilinum fust saisie par surprinse. Et cela pourtant au siecle et des plus iustes Capitaines et de la plus parfaicte milice Romaine: car il n'est pas dict, qu'en temps et lieu il ne soit permis de nous preualoir de la sottise de noz ennemis, comme nous faisons de leur lascheté. Et certes la guerre a naturellement beaucoup de priuileges raisonnables au preiudice de la raison. Et icy faut la regle, _neminem id agere, vt ex alterius prædetur inscitia_. Mais ie m'estonne de l'estendue que Xenophon leur donne, et par les propos, et par diuers exploicts de son parfaict Empereur: autheur de merueilleux poids en telles choses, comme grand Capitaine et Philosophe des premiers disciples de Socrates; et ne consens pas à la mesure de sa dispense en tout et par tout. Monsieur d'Aubigny assiegeant Cappoüe, et apres y auoir fait vne furieuse baterie, le Seigneur Fabrice Colonne, Capitaine de la ville, ayant commencé à parlementer de dessus vn bastion, et ses gens faisants plus molle garde, les nostres s'en emparerent, et mirent tout en pieces. Et de plus fresche memoire à Yuoy, le Seigneur Iulian Rommero, ayant fait ce pas de clerc de sortir pour parlementer auec Monsieur le Connestable, trouua au retour sa place saisie. Mais afin que nous ne nous en allions pas sans reuanche, le Marquis de Pesquaire assiegeant Genes, où le Duc Octauian Fregose commandoit soubs nostre protection, et l'accord entre eux ayant esté poussé si auant, qu'on le tenoit pour fait, sur le point de la conclusion, les Espagnols s'estans coullés dedans, en vserent comme en vne victoire planiere: et depuis à Ligny en Barrois, où le Comte de Brienne commandoit, l'Empereur l'ayant assiegé en personne, et Bertheuille Lieutenant dudict Comte estant sorty pour parlementer, pendant le parlement la ville se trouue saisie.

_Fù il vincer sempre mai laudabil cosa, Vinca si ò per fortuna ò per ingegno,_

disent-ils: mais le Philosophe Chrysippus n'eust pas esté de cet aduis: et moy aussi peu. Car il disoit que ceux qui courent à l'enuy, doiuent bien employer toutes leurs forces à la vistesse, mais il ne leur est pourtant aucunement loisible de mettre la main sur leur aduersaire pour l'arrester: ny de luy tendre la iambe, pour le faire cheoir. Et plus genereusement encore ce grand Alexandre, à Polypercon, qui luy suadoit de se seruir de l'auantage que l'obscurité de la nuict luy donnoit pour assaillir Darius: Point, dit-il, ce n'est pas à moy de chercher des victoires desrobees: _malo me fortunæ pœniteat, quàm victoriæ pudeat_.

_Atque idem fugientem haud est dignatus Orodem Sternere, nec iacta cæcum dare cuspide vulnus: Obuius, aduersóque occurrit, séque viro vir Contulit, haud furto melior, sed fortibus armis._