Pour la belle esclairée

SONNET.

QVE voſtre diligence à mes vœux est contraire,
Vous qui ſur ma Phillis, veillez inceſſamment :
Conſiderez vn peu qu’il n’est pas neceſſaire
D’eſclairer vn Soleil qui luit ſi viuement.
Prenez plus de repos pour mon contentement,
Ne vous en tenez pas ſi prés qu’à l’ordinaire ;
Et ſouffrez qu’en ſecret ie luy parle vn moment
Puiſque c’eſt le ſeul bien qui me peut ſatisfaire.
De grace, laiſſez nous l’vſage de la voix ;
Ces charmantes beautez qui me donnent des loix
Ne ſont pas des ſujets qu’on doiue ainſi contraindre.
Dieux ! auec vostre ſoin qui me vient trauerſer,
Et dont vous m’empeſchez auiourd’huy de me plaindre,
Vous deuiez empeſcher ſes yeux de me bleſſer.