Lettres · 13

e dimanche XIIII feurier MV trente quatre en loſtel dieu apres diſner maiſtre Charles medicin a fait requeſte pour auoir la charge de medicin dudit hoſpital au lieu de M Rabellaiſe qui ſeſt abſenté. M Pierre du Caſtel a fait pour luy ſemblable requeſte, Maiſtre Canape a fait ſemblable requeſte pour luy.

Le mardy XXIII feurier MV XXXIIII en loſtel commun apres diſner..... Leſdits ſieurs conſeilliers ont mys en termes de pourueoir d’vn medecin à loſpital du pont du Roſne au lieu de maiſtre Rabelays qui ſeſt abſenté & a habandonné ledit hoſpital ſans aduis ne prendre congé auſſi les requeſtes faictes tant de la part de maiſtre Charles que de maiſtre Canape & maiſtre du Caſtel car les vngs eſtoient dopinion dy pourueoir & de proceder à eſlire l’vn ou l’autre les autres que lon deuoit atendre iuſques apres Paſques ſe ledit Rabellays viendrait ou non. Eſt ſuruenu ledit ſieur Humbert Gimbre conſeillier auquel a eſté demandé ſon opinion ſur ce que deſſus lequel a dit & opiné comme ſenſuit :

Ledit Gimbre a opiné & dit quon y doit pourueoir & qu’il y a eu aſſez temps pour y auoir penſé. Pour les requeſtes quon luy auoit faictes ſon intention eſtoit deſlire & nommer ledit maiſtre Charles neanmoings pour ce que depuys monſieur de Montrotier qui donne chacun an audit hoſpital III liures tournoys & plus faict grande requeſte & inſtance pour ledit maiſtre du Caſtel attendu auſſi que le moindre des deux eſt aſſez ſuffizant il donne ſa voix & eſlit ledit maiſtre du Caſtel.

Sieur Iacques Fenoil pour ſemblables cauſes & affin de ne diuertir ledit ſieur de Montrotier du bien quil faict audit hoſpital auſſi monſieur Vauzelles ſon frere de l’amour qu’il porte & biens quil faict audit hoſpital a donné & donne ſa voix audit maiſtre du Caſtel comme bien ydoine & ſeuffizant.

Ledit Pierre Durand a dit que lon doit ſuperceder dy pourueoir iuſques apres Paſques car il a entendu que ledit Rabellays eſt à Grenoble & porra reuenir.

Ledit de La Porte dit quil neſt requis y pourueoir ſi promptement ſans y bien penſer.

Monſieur Iehan Guillaud dit que lon doit bien y penſer.

Ledit Rochefort eſt bien dauis atendre & quil vouldroit bien ſcauoir laduis de monſieur de Montrotier.

Ledit Camus a dit quil ſeſt bien lintencion dudit ſieur de Montrotier qui fait grande requeſte & inſtance pour ledit maiſtre du Caſtel & quil a ſceu des medecins & apoticaires que ledit du Caſtel eſt tres ſouffizant pour auoir ladite charge & luy donne ſa voix.

Ledit Guillen ſen remet à la pluralité des voix.

Ledit Maniſſier eſt dopinion de ny pourueoir pour le preſent.

Ledit Doulhon en concluant pour la diuerſité des opinions a continué la matiere iuſques à ieudy prochain au conſulat & entredeux chaſcun y penſera.

Le vendredy V mars MV trente quatre en loſtel commun… Leſdits ſieurs ont procédé à eſlire vng medecin pour le ſeruice du grant hoſpital du pont du Roſne au lieu de maiſtre François Rabellayſe medecin qui ſeſt abſenté de la ville & dudit hoſpital ſans congé prendre pour la deuxieſme foys & ont tous d’vne voix eſlu maiſtre Pierre du Caſtel docteur medecin aux gaiges toutesfois de trente liures tournoys à laquelle ſomme de XXX liures ils ont admoderé les gaiges anciens qui eſtoient de quarante liures tournoys & pour ce lont fait venir & luy auoir declaré ladite eſlection il la acceptee auſdits gages de trente liures tant quil plaira au conſulat lequel a promis & iuré de bien ſeruir leſdits pour es diligemment & loyaument faire ſon ſeruice.