Gargantua · 30

es lettres dictees & ſignees, Grandgouſier ordonna que Vlrich Gallet, maiſtre de ſes requeſtes, homme ſaige & diſcret, duquel en diuers & contencieux affaires il auoit eſprouué la vertus & bon aduis, allaſt deuers Picrochole, pour luy remonſtrer ce que par eux auoit eſté decreté.

En celle heure partit le bon homme Gallet, & paſſé le gué, demanda au meuſnier, de l’eſtat de Picrochole : lequel luy feiſt reſponce que ſes gens ne luy auoient laiſſé ny coq ny geline, & qu’ilz s’eſtoient enſerrez en la roche Clermauld, & qu’il ne luy conſeilloit poinct de proceder outre, de peur du guet, car leur fureur eſtoit enorme. Ce que facilement il creut, & pour celle nuict herbergea auecques le meuſnier.

Au lendemain matin ſe tranſporta auecques la trompette à la porte du chaſteau, & requiſt es guardes qu’ilz le feiſſent parler au roy pour ſon profit.

Les parolles annoncees au roy, ne conſentit aulcunement qu’on luy ouuriſt la porte, mais ſe tranſporta ſus le boleuard & diſt à l’embaſſadeur : Qui a il de nouueau ? que voulez vous dire ? Adoncques l’embaſſadeur propouſa comme s’enſuit.