Gargantua · 43

icrochole, à la relation de ceulx qui auoient euadé à la roupte lors que Tripet fut eſtripé, feut eſprins de grand courroux, ouyant que les diables auoient couru ſuz ſes gens, & tint ſon conſeil toute la nuict, auquel Haſtiueau & Toucquedillon conclurent que ſa puiſſance eſtoit telle qu’il pourroit defaire tous les diables d’enfer s’ilz y venoient. Ce que Picrochole ne croyoit du tout, auſſy ne s’en defioit il.

Pourtant enuoya ſoubz la conduicte du conte Tyrauant, pour deſcouurir le pays, ſeize cents cheualiers tous montez ſus cheuaulx legiers, en eſcarmouſche, tous bien aſpergez d’eau beniſte & chaſcun ayant pour leur ſigne vne eſtolle en eſcharpe, à toutes aduentures, s’ilz rencontroient les diables, que par vertus tant de ceſte eau Gringorienne, que des eſtolles, yceulx feiſſent diſparoir & eſuanouyr. Coururent doncques iuſques pres la Vau Guyon & la maladerye, mais oncques ne trouuerent perſonne à qui parler, dont repaſſerent par le deſſus, & en la loge & tugure paſtoral, pres le Couldray, trouuerent les cinq pelerins. Leſquels liez & baffouez emmenerent comme s’ilz feuſſent eſpies, non obſtant les exclamations, adiurations & requeſtes qu’ilz feiſſent. Deſcendus de là vers Seuillé, furent entenduz par Gargantua, lequel diſt à ſes gens. Compaignons, il y a icy rencontre, & ſont en nombre trop plus dix foys que nous. Chocquerons nous ſus eulx ? Que diable (diſt le moyne) ferons nous doncq ? Eſtimez vous les hommes par nombre, & non par vertus & hardieſſe ?

Puis s’eſcria. Chocquons, diables, chocquons. Ce que entendens, les ennemys penſoient certainement que feuſſent vrays diables, dont commencerent fuyr à bride auallee, excepté Tyrauant, lequel coucha ſa lance en l’arreſt, & en ferut à toute oultrance le moyne au milieu de la poictrine, mais rencontrant le froc horrifique, rebouſcha par le fer, comme ſi vous frappiez d’vne petite bougie contre vne enclume. Adoncq le moyne auec ſon baſton de croix luy donna entre col & collet ſus l’os acromion ſi rudement qu’il l’eſtonna : & feiſt perdre tout ſens & mouement, & tomba es piedz du cheual.

Et voyant l’eſtolle qu’il portoit en eſcharpe, diſt à Gargantua : « Ceulx cy ne ſont que prebſtres, ce n’eſt q’vn commencement de moyne : par ſainct Iean ie ſuis moyne parfaict : ie vous en tueray comme de mouſches. Puis le grand gualot courut apres, tant qu’il atrapa les derniers, & les abbaſtoit comme ſeille, frappant à tors & à trauers. Gymnaſte interrogua ſus l’heure Gargantua s’ilz les debuoient pourſuiure. A quoy diſt Gargantua. Nullement. Car ſelon vraye diſcipline militaire, iamais ne fault mettre ſon ennemy en lieu de deſeſpoir. Par ce que telle neceſſité luy multiplie ſa force, & accroiſt le couraige, qui ia eſtoit deiect & failly. Et n’y a meilleur remede de ſalut à gens eſtommiz & recreuz que de ne eſperer ſalut aulcun. Quantes victoires ont eſté tollues des mains des vaincqueurs par les vaincuz, quand il ne ſe ſont contentés de raiſon : mais ont attempté du tout mettre à internition & deſtruire totallement leurs ennemys, ſans en vouloir laiſſer vn ſeul pour en porter les nouuelles. Ouurez touſiours à voz ennemys toutes les portes & chemins, & pluſtoſt leurs faictes vn pont d’argent affin de les renuoyer. Voyre, mais (diſt Gymnaſte) ilz ont le moyne. Ont ilz (diſt Gargantua) le moyne ? Sus mon honneur, que ce ſera à leur dommaige. Mais affin de ſuruenir à tous azars, ne nous retirons pas encores, attendons icy en ſilence. Car ie penſe ia aſſez congnoiſtre l’engin de noz ennemys. Ils ſe guident par ſort, non par conſeil. Iceulx ainſi attendens ſoubz les noiers, ce pendent le moyne pourſuyuoit, chocquant tous ceulx qu’il rencontroit, ſans de nully auoir mercy. Iuſque à ce qu’il rencontra vn cheualier qui portoit en crope vn des pauures pelerins, & là, le voulent mettre à ſac, s’eſcria le pelerin. Ha, monſieur le priour mon amy, monſieur le priour, ſauuez moy, ie vous en prie. Laquelle parolle entendue, ſe retournerent arriere les ennemys, & voyans que là n’eſtoit que le moyne qui faiſoit ceſt eſclandre, le chargerent de coups comme on faict vn aſne de boys, mais de tout rien ne ſentoit, meſmement quand ilz frapoient ſus ſon froc, tant il auoit la peau dure. Puis le baillerent à guarder à deux archiers, et, tournans bride, ne veirent perſonne contre eulx, dont exiſtimerent que Gargantua eſtoit fuy auecques ſa bande. Adoncques coururent vers les Noyrettes tant roiddement qu’ilz peurent pour les rencontrer, & laiſſerent là le moyne ſeul auecques deux archiers de guarde. Gargantua entendit le bruit & henniſſement des cheuaulx & dict à ſes gens. Compaignons, i’entends le trac de noz ennemys, & ia apperçoy aulcuns d’iceulx qui viennent contre nous à la foulle. Serrons nous icy, & tenons le chemin en bon ranc : par ce moyen nous les pourrons recepuoir à leur perte & à noſtre honneur.

Una salus victis nullam sperare salutem.

(Virgile, Ænieid., II, v. 354)