Gargantua · 49

icrochole ainſi deſeſperé, s’en fuyt vers l’Iſle Bouchart, & au chemin de Riuiere ſon cheual bruncha par terre, à quoy tant feut indigné que de ſon eſpee le tua en ſa chole, puis ne trouuant perſonne qui le remontaſt voulut prendre vn aſne du moulin qui là aupres eſtoit, mais les meuſniers le meurtrirent tout de coups & le deſtrouſſerent de ſes habillemens, & luy baillerent pour ſoy couurir vne meſchantes ſequenye. Ainſi s’en alla le pauure cholericque, puis paſſant l’eau au port Huaux, & racontant ſes males fortunes, feut aduiſé par vne vieille lourpidon que ſon royaulme luy ſeroit rendu à la venue des Cocquecigrues : depuis ne ſçait on qu’il eſt deuenu. Toutesfoys l’on m’a dict qu’il eſt de preſent pauure gaignedenier à Lyon, cholere comme dauant. Et touſiours ſe guemente à tous eſtrangiers de la venue des Cocquecigrues, eſperant certainement ſcelon la prophetie de la vieille, eſtre à leur venue reintegré à ſon royaulme. Apres leur retraicte Gargantua premierement recenſa les gens, & trouua que peu d’iceulx eſtoient peryz en la bataille, ſçauoir eſt quelques gens de pied de la bande du capitaine Tolmere, & Ponocrates qui auoit vn coup de harquebouze en ſon pourpoinct. Puis les feiſt refraiſcher chaſcun par ſa bande & commanda es theſauriers que ce repas leur feuſt defrayé & payé, & que l’on ne feiſt oultrage quelconques en la ville, veu qu’elle eſtoit ſienne, & apres leur repas ilz comparuſſent en la place dauant le chaſteau, & là ſeroient payez pour ſix moys. Ce que feut faict. Puis feiſt conuenir dauant ſoy en ladicte place tous ceulx qui là reſtoient de la part de Picrochole, eſquelz, preſens tous ſes Princes & capitaines, parla comme s’enſuyt.