LeTiersLivre · Épigraphe

à l’eſprit de la royne
de Nauarre.

Eſprit abſtraict, rauy, & ecſtatic,
Qui frequentant les cieulx, ton origine,
As delaiſſé ton hoſte & domeſtic,
Ton corps concords, qui tant ſe morigine
A tes edictz, en vie peregrine
Sans ſentement, & comme en Apathie :
Vouldrois tu poinct faire quelque ſortie
De ton manoir diuin, perpetuel ?
Et ça bas veoir vne tierce partie
Des faictz ioyeux du bon Pantagruel ?

Iean Favre av lectevr.

Ia n’eſt beſoing, amy Lecteur, t’eſcrire
Par le menu le prouffit & plaiſir

Que receuras ſi ce liure veux lire,
Et d’iceluy le ſens prendre as deſir ;
Vueille donc prendre à le lire loiſir,
Et que ce ſoit auec intelligence.
Si tu le fays, propos de grand’ plaiſance
Tu y verras, & moult prouffiteras,
Et ſi tiendras en grand reſiouyſſance
Le tien Eſprit, & ton temps paſſeras.