Comment Pantagruel trouva Panurge, lequel il ayma toute sa vie. xxxxx Cha. ix

NG iour Pantagruel se pourmenant hors de la ville vers labbaye saint Antoine devisant et philosophant avecques ses gens et aulcuns escholliers, rencontra ung homme beau de stature et elegant en tous lineamans du corps, mais pitoyablement navre en divers lieux, et tant mal en ordre quil sembloit quil feut eschappe es chiens, ou mieulx ressembloit ung cueilleur de pommes du pays du Perche. Et de tant loing que le vit Pantagruel, il dist es assistans. Voyez vous cest homme qui vient par le chemin du pont Charanton. Par ma foy, il nest pauvre que par fortune : car ie vous asseure qua la physionomie nature la produyt de riche et noble lignee, mais les adventures des gens curieux le ont reduyt en telle penurie et indigence. Et ainsi quil fut au droict dentre eulx, il luy demanda. Mon amy ie vous prie que ung peu veuillez icy arrester et me respondre a ce que vous demanderay, vous ne vous en repentirez point : car iay affection tresgrande de vous donner ayde en mon povoir en la calamite ou ie vous voy : car vous me faictes grand pitie. Pourtant mon amy dictes moy qui estes vous, dont venez vous, ou allez vous, que querez vous, et quel est vostre nom ? Et le compaignon luy respond en langue Germanicque. Junker Gotte geb euch glück unnd hail. Zuvor lieber iuncker ich las euch wissen das da ir mich von fragt, ist ein arm unnd erbarmglich ding, unnd wer vil darvon zu sagen, welches euch verdrustlich zuhoeren, unnd mir zu erzelenwer, wievol die Poeten unnd Orators horzeiten haben gesagt in iren sprüchen unnd sentenzen, das die gedechtnus des ellends unne armvot vorlangs erlitten, ist ein grosser lust. A quoy respondit Pantagruel. Mon amy ie nentends point ce barragouyn, et pourtant si voulez quon vous entende parlez aultre langaige. Adoncques le compaignon luy respondit : Al barildim gotfano dech min brin alabo dordin falbroth ringuam albras. Nin porth zadilrim almucathin milko prim al elmim enthoth dal heben enfouim : kuth im aldim alkatim nim broth dechoth porth min michas im endoth, pruch dal marsouim hol moth dansrikim lupaldar im holdemoth. Nin hur diavolth mnarbothim dal goulch pal frapin duch im scoth pruch galeth dal chinon, mir foultrich al conin butbathen doth dal prim. Entendez vous rien la ? dist Pantagruel es assistans. A quoy dist Epistemon. Ie croy que cest langaige des Antipodes, le diable ny mordroit pas. Lors dist Pantagruel. Compere, ie ne scais si les murailles vous entendront, mais de nous nul ny entends note.Donc dist le compaignon. Signor mio voi videte per exemplo che la Cornamusa non suona mai si la non a il ventre pieno, Cosi io parimente non vi sapre contare le mie fortune, se prima il tribulato ventre non la solita refectione. Al quale adviso che la mani et li denti abbui perso illoro ordine naturale et del tutto annichillati. A quoy respondit Epistemon. Autant de lung comme de laultre. Dont dit Panurge. Heere ie en spreke anders gheen taele dan kerste taele, my dunct nochtans, al en seg ie v niet een wordt, myven noot verclaert ghenonch wat ie beglere, gheest my vnyt hermhertlicheyt yet waer vn ie ghevoet mach zung. A quoy respondit Pantagruel. Autant de celluy la. Donc dist Panurge. Señor de tanto hablar yo soy cansado, por que supplico a vostra reverentia que mire a los preceptos evangelicos, para que ellos movant vostra reverentia a lo ques de conscientia, y sy ellos non bastarent para mover vostra reverentia a piedad, supplico que mire a la piedad natural laqual yo creo que le moura como es de razon, y con esto non digo mas. A quoy respondit Pantagruel, dea mon amy. Ie ne fays doubte aulcun que ne sachez bien parler divers langaiges, mais dictes nous ce que vouldrez en quelque langue que puissons entendre. Lors dist le compaignon. Adoni scholom lecha : im ischar harob habdeca bemeherah thithen li kikar lehem, cham cathub laal al adonai cho nen ral. A quoy respondit Epistemon. A ceste heure ay ie bien entendu : Car cest langue Hebraicque bien Rhetoricquement pronuncee. Donc dit le compaignon. Despota tynin panagathe, dioti sy mi uc artodotis, horas gar limo analiscomenon eme athios, ce en io metaxy eme uc eleis udamos, zetis de par ha u chre, ce homos philologi pandes homologusi to te logus te ce rhemata peritta hyparchin, opote pragma asto pasi delon esti. entha gar anacei mon logi isin, hina pragmata (hon peri amphibetumen) me prosphoros epiphenete. Quoy ? dist Carpalim lacquays de Pantagruel, cest Grec, ie lay entendu. Et comment as tu demoure en Grece ? Donc dist le compaignon. Agonou dont oussys vou denaguez algarou, nou den farou zamist vou mariston ulbrou, fousquez vou brol tam bredaguez moupreton den goul houst, daguez daguez nou croupys fost bardou noflist nou grou. Agou paston tol nalprissys hourtou los ectabanous, prou dhouquys brol panygou den bascrou nou dous caguous goulfren goul oust troppassou. Ientends ce me semble, dist Pantagruel : car ou cest langaige de mon pays de Utopie, ou bien luy ressemble quant au son. Et comme il vouloit commencer quelque propos, le compaignon dist. Jam toties vos per sacra perque deos deasque omnis otestatus sum, ut si qua vos pietas permovet, egestatem meam solaremini, nec hilum proficio clamans et eiulans. Sinite, queso, sinito viri impii quo me fata vocant abire, nec ultra vanis vestris interpellationibus obtundatis, memores veteris illius adagii, quo venter famelicus auriculis carere dicitur. Dea mon amy dist Pantagruel, ne scavez vous parler françoys ? Si fois tresbien seigneur, respondit le compaignon, Dieu mercy : cest ma langue naturelle et maternelle, car ie suis ne et ay este nourry ieune au iardin de France. Doncques, dist Pantagruel, Racomptez nous, quel est vostre nom, et dont vous venez. Car par ma foy ie vous ay ia pris en amour si grande, que si vous condescendez a mon vouloir, vous ne bougerez iamais de ma compaignie, et vous et moy ferons ung nouveau per damytie telle que fut entre Enee et Achates. Seigneur dist le compaignon. Mon vray et propre nom de baptesme, est Panurge, et a present viens de Turcquie, ou ie fuz mene prisonnier lors quon alla a Metelin en la male heure. Et voulentiers vous racompteroys mes fortunes qui sont plus merveilleuses, que celles de Ulysses, mais puisquil vous plaist me retenir avecques vous, et que ie accepte voulentiers loffre protestant iamais ne vous laisser, et allissiez vous a tous les diables, nous aurons en autre temps plus commode, assez loysir den racompter, car pour ceste heure iay necessite bien urgente de repaistre, dentz agues, ventre vuyde, gorge seiche, tout y est delibere si me voulez mettre en œuvre, ce sera basme de me veoir briber, pour Dieu donnez y ordre. Lors commanda Pantagruel, quon le menast en son logis et quon luy apportast force vivres. Ce que fut faict, et mangea tresbien a ce soir, et sen alla coucher en Chappon, et dormit iusques au lendemain heure de disner.