XXXVI. - XXXVII.

De pouvreté me guermentant, Souventesfoys me dit le cueur: «Homme, ne te doulouse tant Et ne demaine tel douleur, Se tu n'as tant qu'eust Jacques Cueur. Myeulx vault vivre soubz gros bureaux Pauvre, qu'avoir esté seigneur Et pourrir soubz riches tumbeaux!»

Qu'avoir esté seigneur!... Que dys? Seigneur, lasse! ne l'est-il mais! Selon ce que d'aulcun en dict, Son lieu ne congnoistra jamais. Quant du surplus, je m'en desmectz. Il n'appartient à moy, pécheur; Aux théologiens le remectz, Car c'est office de prescheur.